Eth sindic d’Aran, Carlos Barrera, inspeccionant es pistes e camins de Bossòst que s’an de recuperar.

Pendent es mesi de seteme e octobre eth Conselh Generau d’Aran iniciarà es òbres de recuperacion de diferenti camins e pistes en municipi de Bossòst. Era inversion que realizarà eth Conselh Generau ei de 50.000 èuros.

I a tres punts d’actuacion: eth camin de Bossòst enquiara Centrau Idroelectrica de Camun, qu’abilite ua gessuda alternativa des der aute costat der arriu Garona. Ua auta accion ei era dubèrtura dera pista de Margalida, d’interès toristic e coma recorregut de BTT, aguesta melhora se completarà damb era aportacion der Ajuntament de Bossòst. Pendent sèt ans era pista de Margalida a estat barrada e desatesa. Fin finau se rebastirà eth tram deth Camin reiau nomentada Cledes, que junh as poblacions de Les e Bossòst, e que permet era practica deth senderisme.

Eth sindic d’Aran, Carlos Barrera, a volut soslinhar qu’era recuperacion d’aguesti camins e pistes ei possibla gracies ath convèni soscrit damb era Fondacion Endesa e eth Conselh Generau d’Aran, dempús de longues negociacions.