Aguest projècte pilòt, desvolopat a trauès der Airau 5G qu’impulse Generalitat de Catalunya, la Fundación i2CAT, Mobile World Capital Barcelona e eth Conselh Generau d’Aran, a trauès deth Hub d’Innovacion Rurau Hèpic, facilite a quinsevolh persona gaudir de manèra interactiva dera natura e era cultura dera Val d’Aran damb experiéncies immersives e realitat aumentada.
Eth Conselh Generau d’Aran a acuelhut aguest maitin era presentacion deth projècte Guarda+ ua iniciativa innovadora entà redusir era brèca digitau en zònes ruraus. Eth projècte a desvolopat ua solucion pionèra de realitat aumentada e virtuau, dessenhada entà enriquir era experiéncia deth senderisme e torisme ena Val d’Aran, mejançant era 5G. Aguesta solucion aufrís informacion en temps reau sus rotes, condicions meteorologiques e d’autes dades d’interès, entà auançar entara inclusion plia ena èra digitau.
Eth projècte pilòt s’includís laguens der Airau Digitau d’Aran, impulsat pes actors locaus, com eth Conselh Generau d’Aran, era Generalitat de Catalunya, la Fundación i2CAT y el Mobile World Capital, era Diputació de Lleida, era Cambra de Comèrç de Lleida e era empresa tecnologica deth projècte Arantec, . Aguesta iniciativa ei part deth projècte Àrees Digitals dera Generalitat de Catalunya, damb er objectiu fomentar er usatge des tecnologies digitaus auançades entara transformacion deth territòri.
“Eth govèrn d’Aran a coma ua des sues prioritats er impuls dera innovacion coma esturment de diversificacion economica deth territòri ath temps que mos plaçam coma referents en desvolopament territoriau innovador”, soslinhe era sindica d’Aran, Maria Vergés, en tot híger que “era Val d’Aran compde dejà damb empreses fòrça destacades e puntères en aguest àmbit, coma ei eth cas d’Arantec, qu’a desvolopat aguesta tecnologia en nòste territòri”.
En aguest sens era sindica d’Aran a destacat tanben era importància de projèctes que, coma aguest, prebotgen era collaboracion entre es institucions e, sustot, es sinergies entre er encastre public e eth privat.
Entath conselhèr d’Innovacion, Oriol Sala: “Trabalham entà trincar era brèca digitau en Aran, e aguest ei un projècte que se hig as que dejà impulsam a trauès deth Hub d’Innovacion Rurau Hè-Pic”.
Era volontat deth govèrn d’Aran ei eth de desplegar progressivaments aguesta tecnologia en airaus vinculadi ara cultura e eth patrimòni, eth torisme e era gestion des risqui meteorologics.
Vielha, 03 d’Octobre de 2024