• Aguesta iniciativa de micromecenatge preve ajudar a finançar sies projèctes damb retorn sociau enes territòris deth Naut Pirenèu e Aran, en tot complementar damb hons publics es aportacions dera ciutadania a trauès dera plataforma goteo.org

Un còp mès, eth Conselh Generau d’Aran se hig ara convocatòria de finançament collectiu de projèctes damb retorn sociau ath territòri, Matchfunding Arrela’t Naut Pirenèu e Aran, qu’a coma objectiu contribuïr a méter en practica naues formules entà reactivar el teishit socioeconomic deth Naut Pirenèu e Aran.

En aguesta segona edicion dera campanha de micromecenatge Arrela’t Naut Pirenèu e Aran es administracions (entre eres, eth govèrn aranés), complementen damb un hons public de 24.000 € es aportacions dera ciutadania a trauès dera plataforma Goteo.org. Aguest ei un esturment digitau de finançament collectiu entath desvolopament de projèctes damb finalitats sociaus, culturaus, educatives o d’autes.

Se preve repartir un minim de 48.000 € en un maxim de 6 projectes que s’escuelheran, per part d’un jurat independent, en foncion des bases previstes.

Aguesta segona convocatòria seguirà era linha dera prumèra, qu’auec lòc en 2020 e que siguec tot un exit. Serà un procés de diferentes jornades de trabalh que culminarà damb ua campanha de finançament collectiu. En prumèr lòc, entà dar a conéisher aguesta convocatòria e ajudar a totes es persones interessades a premanir era candidatura des sòns projèctes e hèr hilat, s’a previst un programa d’activitats que comence damb ues jornades comarcaus en caddua des sies comarques:

• 31/05/2022 de 16 a 19 ores: Vòs que t’explica eth men projècte? Coma definir eth men projècte de manèra efectiva, en Pallars Jussà.
• 01/06/2022 de 10:30 a 13:30 ores: Pogui tirar endeuant? Viabilitat economica entath men projècte, ena Alta Ribagorça
• 08/06/2022 de 10:30 a 13:30 ores: Qué voi arténher? Coma definir objectius e indicadors entà enfocar eth men projècte, en Alt Urgell.
• 09/06/2022 de 10:30 a 13:30: Sai çò que voi díder…! Comunicacion d’un projècte empresariau, especialment a trauès de hilats sociaus, ena Val d’Aran.
• 13/06/2022 de 10:30 a 13:30 ores: Quin retorn sociau a eth tòn projècte? Identifica per miei dera economia sociau e solidària es valors, era sostenibilitat e eth retorn sociau entath tòn projècte, ena Cerdanya.
• 15/06/2022 de 10:30 a 13:30 ores: Voi hèr ua campanha! Coma crear recompenses entà hèr campanhes de micromecenatge, en Pallars Sobrirà.

Posteriorament, eth 21 de junh, aurà lòc ua jornada virtuau de tot eth Naut Pirenèu e Aran, a compdar de meitat de junh e pendent tot un mes se daurirà eth concors a on es iniciatives deth Pirenèu e Aran poiràn presentar eth sòn projècte tà qu’un jurat valòre e escuelhe sies guanhadors/es.

Se prevé escuélher un projècte per territòri, d’acòrd damb era puntuacion obtenguda seguint es bases, enes quaus se valòren es mesures previstes peth projècte damb un impacte positiu en territòri en tèrmes sociaus, de sostenibilitat, equilibri territoriau, enfortiment democratic, innovacion e tostemp que s’artenhe era puntuacion minima requerida en tèrmes de viabilitat deth projècte e retorn sociau. En cas de non assolir aguesta puntuacion se prevé poder escuélher eth següent projècte mès puntuat independentament dera comarca o deishar-la desèrta.

Un còp escuelhudi es projèctes, receberàn ua formacion e acompanhament intensiu per part dera Fondacion Goteo, entà dessenhar es respectives campanhes de comunicacion e micromecenatge de besonh entà arténher er objectiu de finançament minim (4.000 € ) des respectius projèctes.

Aguesta iniciativa ei promoguda peth Conselh Generau d’Aran e es Conselhs Comarcaus dera Alta Ribagorça, Alt Urgell, Cerdanya, Pallars Jussà e Pallars Sobirà, es servicis de promocion economica e trabalh d’aguestes institucions, er Institut entath Desvolopament e era Promocion deth Naut Pirenèu e Aran (IDAPA),  eth Consòrci GAL Alt Urgell – Cerdanya, eth Consòrci Leader Pirenèu Occidentau e er Ateneu Cooperatiu deth Naut Pirenèu e Aran damb eth supòrt dera DG de Joenessa, era Deputacion de Lleida e era de Girona.