Aguest passat dijaus, era sindica d’Aran e eth president deth grèmi d’Ostalaria dera Val d’Aran signauen eth convèni de collaboracion entre es dues institucions qu’a de servir entà méter en valor era gastronomia aranesa ath long der an en tot organizar dus eveniments conjuntaments.

Era sindica d’Aran, Maria Vergés e eth president deth Grèmi d’Ostalaria, Carlos José Sigüenza, vien de signar un convèni de collaboracion qu’a de servir entà méter en valor era gastronomia e es productes agroalimentaris dera Val d’Aran. Aguest acòrd s’encastre en dues jornades de dinamizacion, que se haràn ath torn de dus eveniments, eth prumèr nomentat,» GastroAran», impulsat peth pròpri Grèmi, ena tempsada de tardor e eth dusau, ath torn des actes der Hestau Culturau «TerSon», organizat peth govèrn aranés.

Entara sindica d’Aran, Maria Vergés «era nòsta volontat ei impulsar era gastronomia dera Val d’Aran coma un des recorsi toristics mès destacadi qu’auem pr’amor qu’estaque d’un costat, un des elements dera nòsta identitat e tradicions e per aute un atractiu mès deth nòste territòri, ath temps que metem en valor eth naut nivèu e professionalitat deth sector dera restauracion aranesa” en aguest sens higíe: «Des deth Conselh Generau d’Aran volem méter en valor eth trabalh de dinamizacion deth territòri enes accions que  s’amien a tèrme pes entitats araneses damb era capacitat de contribuïr e hèr efectiva ua transformacion e melhora des projèctes de desvolopament que sorgissen en territòri, coma ei eth Grèmi d’Ostalaria dera Val d’Aran.

Vielha, 21 de deseme de 2024