• HèPic, eth Centre d’Innovacion Territoriau d’Aran a estat present n’aguesta trobada nacionau, en tot representar ath Conselh Generau d’Aran e explicar es accions qu’era maxima institucion aranesa amie a tèrme en matèria d’innovacion. 

•  Eth Hub d’Innovacion Territoriau d’Aran forme part der hilat de CITs de tota Espanha e qu’ei impulsada peth Ministèri tara Transicion Ecologica e Rèpte Demografic.

HèPic, eth Hub d’Innovacion Territoriau  deth Conselh Generau d’Aran prenec part en dusau “Encuentro Nacional de la RedCIT” que se celebrèc era setmana passada ena ciutat leonesa de Ponferrada.

Aguest eveniment amassaue a mès de 450 persones vengudes de tot er Estat espanhòu, entre es que se trapauen representants institucionaus, membres des diuèrsi CITs, empreses, start-up’s, associacions e agents sociaus e economics qu’apòsten per un futur entàs territòris ruraus.

HèPic forme part der hilat de Centres d’Innovacion Territoriau, ua iniciativa impulsada pera Secretaria Generau de Rèpte Demografic deth Ministèri de Transicion Ecologica e Rèpte Demografic qu’amasse onze centres de tota Espanha damb er objectiu de potenciar eth mon rurau, desvolopar projèctes d’innovacion adaptadi ara realitat de cada zòna e promòir ua milhora dera qualitat de vida enes pòbles.

Ena trobada poderen escambiar idèes, metodologies e bones practiques entà impulsar ua dinamizacion reau e sostenibla des territòris de baisha densitat de poblacion. Se realizèren conferéncies, debats, taules redones e presentacions de projèctes a on destaquèren es potencialitats de cada territòri e se tracèren camins comuns entà superar es rèptes qu’afècten de forma similara a totes es zònes ruraus, coma era manca de servicis basics, era despoblacion, era manca d’oportunitats laboraus o era escassa connectivitat tecnologica.

Era ministra de Transicion Ecologica e Rèpte Demografic, Sara Aagesen, acompanhada deth Secretari Generau de Rèpte Demografic, Paco Boya, visitèren er stand de HèPic en tot conéisher de forma dirècta es projèctes mès innovadors que se desvolopen actuauments en Aran, coma eth desplegament der hilat d’antenes de radiofreqüéncia LoRa que permet ua cobertura de connectivitat en mès deth 80% dera Val d’Aran, e que permet, entre d’auti, eth seguiment e contròl des ramats enes montanhes; eth projècte OviHuec, eth ramat municipau de Vilamòs destinat ara reduccion deth risc d’incèndis e de metuda en valor deth producte agroalimentari o eth projècte pilòt amiat a tèrme damb era empresa Pirineos Drone Aviation, que permeterà testejar eth transpòrt de mercaderies damb drons d’enquia 100 kg en zònes d’accès complicat, ua solucion que pòt reconfigurar eth modèl logistic en zònes de montanha.

Eth vicesindic dusau e conselhèr de gestion ambientau e Innovacion, Oriol Sala, avaloraue “fòrça positivaments aguesta trobada nacionau pr’amor qu’ei ua escadença excellenta entà visibilizar es problematiques pròpries des zònes ruraus, promòir estratègies comunes e crear ligams damb d’auti territòris qu’afronten rèptes semblants.” En tot híger que “damb aguesta participacion, se refortilhe era posicion dera Val d’Aran coma un territòri innovador e capdauantèr en projèctes que combinen sostenibilitat, tecnologia e preservacion deth paisatge”.

Vielha, 23 d’abriu de 2025