• Eth passat mes de mai, era sindica d’Aran, Maria Vergés, s’amassaue en Madrid damb eth secretari d’Estat d’Abitatge e Agenda Urbana, David Lucas, entà hèr-li a arribar era complèxa situacion que patís era Val d’Aran per çò que hè ar accès ar abitatge, en tot emplaçar-se a estudiar era collaboracion der Estat, amassa damb era Generalitat e eth Conselh Generau d’Aran, tar impuls de viuenda publica assequibla.

• Atau madeish, dempús d’aguesta trobada, eth govèrn d’Aran sollicitèc a toti es ajuntaments aranesi que podessen facilitar eth listrat de terrens e edificis de titularitat municipau enes que se poderie bastir abitatge public, en tot recéber aguesta informacion per part des consistòris de Les, Canejan, Vilamòs, Es Bòrdes e Vielha e Mijaran.

• Aguesta iniciativa se hig tanben ar anonci hèt peth govèrn dera Generalitat de Catalunya entà bastir abitatge de loguèr public pendent es pròplèu cinc ans, enquia 2030.

Era sindica d’Aran a hèt a arribar ath secretari d’Estat d’Abitatge es resultats des compilacions des terrens e espacis de titularitat municipau facilitadi ath Conselh per part de diuèrsi ajuntaments aranesi, ua mesura qu’a de servir entà qué, per part deth Ministèri, e damb era rèsta d’administracions competentes, s’avalòre era posibilitat d’impulsar abitatge public en territòri.

Eth passat mes de mai, era sindica d’Aran, Maria Vergés, s’amassèc en Madrid damb eth secretari d’Estat d’Abitatge e Agenda Urbana, David Lucas, entà explicar-li  era complèxa situacion que patís era Val d’Aran per çò que hè ar accès ar abitatge. Pendent era amassada convenguéren establir conjuntament possibles vies de collaboracion entre er Estat e eth Conselh Generau d’Aran tà implementar mesures concrètes tà ajudar a palliar aguesta situacion.

Eth govèrn d’Aran a impulsat, amassa damb bona part des ajuntaments aranesi, eth Plan d’Abitatge d’Aran, qu’entre d’autes donades a metut de manifèst que sonque eth 38% der abitatge existent en Aran se dedique a abitatge abituau, e dèishe ath descubèrt un gran nombre d’abitatges destinadi a residéncies segondàries e a usatge toristic, que provòquen un aument deth prètz deth loguèr, que s’a doblat en un an.

En aguest sens cau rebrembar qu’eth govèrn d’Aran hè temps que reclame ara Generalitat de Catalunya eth traspàs deth domèni competenciau que n’aguesta matèria reconeish era Lei de Regim Especiau dera Val d’Aran. Atau madeish, er anonci deth govèrn catalan d’impulsar er abitatge public a trauès d’un programa dessenhat ad aguest efècte, completarie era estratègia deth Conselh Generau d’Aran entà sajar de solucionar aguesta grèu problematica.

Era sindica d’Aran a manifestat “eth besonh qu’es administracions superiores tròben ua formula que balhe supòrt as institucions competentes tà facilitar er accès ar abitatge en territòris tan tensionadi coma era Val d’Aran”.

Ena amassada entre era sindica d’Aran e eth secretari d’Estat, acordauen cercar amassa formules de collaboracion tà desvolopar accions concrètes ena matèria, ja qu’era Lei de Regim Especiau d’Aran permet ath Conselh Generau establir acòrds e convènis damb era administracion der Estat.

Vielha, 22 d’octobre 2024