Eth plen ena prumèra session deth VI periòde de sessions, que se celebrarà aué dimèrcles 21 de gèr, harà eth debat finau dera proposicion de lei deth regim especiau d’Aran
Eth programa de ràdio Meddia Aranés damb Lisa Escala arà un seguiment en dirècte des deth Parlament
A compdar des 16h45, era conductora der informatiu en aranés deth canau 3/24, Ares Riu, entrevistarà ath sindic dera Val d’Aran, Carlos Barrera
Proposicion dera lei d’Aran
Abans dera pausa deth meddia, eth plen harà eth debat finau dera proposicion de lei deth regim especiau d’Aran, elaborada pera ponéncia conjunta, e qu’arribe en debat finau damb esmenes ath contengut de toti es grops. des noranta esmenes reservades, 33 son deth PSC, 17 dera CUP, 16 de C’s, 15 d’ICV-EUiA, 6 deth PPC, 2 de CiU e 1 d’ERC.
Era lei, que vò refortilhar «es interèssi e ligams qu’istoricaments an junhut Aran damb Catalunya», arreconeish era realitat nacionau occitana, dotada d’identitat culturau, istorica, geografica e lingüistica, establís eth regim especiau pròpri d’Aran entà protegir-ne eth caractèr singular, es drets istorics e era identitat, eth dret e era realitat dera organizacion institucionau, politica e administrativa, e ne garantís es competéncies, es recorsi e era autonomia entà ordenar, governar e gerir es interèssi deth territòri. Eth tèxte arrecuelh era division territoriau d’Aran es sies terçons, n’arreconeish eth drapèu, er escut, era hèsta e er imne, e es drets lingüistics damb er aranés coma lengua pròpria e d’usatge preferent enes administracions publiques, era capitalitat de Vielha, e definís es foncions deth Conselh Generau d’Aran e es sòns organs, e eth sistèma electorau per terçons.
Eth jutjament dera lei admet, as disposicions finaus e transitòries, eth dret deth pòble aranés a decidir eth sòn futur, establís ua revision deth modèl de finançament era comission bilaterau govèrn dera Generalitat- Conselh Generau d’Aran en un termini maximal de tres ans, preve qu’eth Parlament demane era reconeishença dera autonomia politica d’Aran en marc d’ua modificacion constitucionau e establís qu’era lei li calerà èster referendada pes aranesi cossent damb era lei de consultes populares.
En tractar-se d’ua lei de desvolopament basic der estatut, cau qu’eth plen l’apròve per majoria absoluta.
Eth sindic d’Aran, Carlos Barrera, abantes d’entrar ath Parlament a manifestat “aguesta prepausa de Lei gessec deth consens de totes es fòrces politiques dera Val d’Aran en 2009, e referendada per unanimitat peth Plen deth Conselh Generau d’Aran e de toti es Ajuntaments aranesi”.
Barrera a hijut “eth tèxte definitiu qu’aué se someterà a votacion peth Plen deth Parlament, a respectat e incús a mielhorat era prepausa de Lei que gessec deth 2009 dera Val d’Aran. Ei un pas ath dauant en reconeishement dera identitat territoriau, istòrica e politica dera Val d’Aran laguens de Catalunya”
Cobertura de mejans de comunicacion
Eth programa de ràdio Meddia Aranés damb Lisa Escala cobrirà en dirècte des deth Parlament, e a compdar dera 16h45, era conductora der informatiu en aranés deth canau 3/24, Ares Riu, entrevistarà eth sindic dera Val d’Aran, Carlos Barrera.
Lleida Tv a compdar des 12h00 harà un programa especiau des deth Parlament.
Podetz seguir en dirècte: http://www.parlament.cat/web/actualitat/canal-parlament/directes?p_cp0=1