I aurà prètzi especiaus en multiples activitats atau coma gratuïtat en ues autes
Entà participar en eveniment, es interessadi an de dispausar dera carta de fidelizacion Val d’Aran Card
Es places son limitades e se pòt reservar deth 26 ath 28 de junh
Foto d’Aran Park
Era Val d’Aran vò dar era benvenguda ar ostiu as sòns visitants damb aufèrtes immielhorables entà toti aqueri clients que dispausen dera carta de fidelizacion Val d’Aran Card. Es dies 5 e 6 de junhsèga debanarà er eveniment Val d’Aran Mountain Summer, a compdar deth quau, es visitants dispausen de prètzi especiaus en multiples activitats eth tot eth territòri pendent aguesta dimenjada.
Ei ua grana oportunitat entà conéisher era Val d’Aran, damb activitats coma: excursions a shivau, ràfting, visita ara piscifactoria de caviar de Les e un conjunt d’excursions damb visites guidades a prètzi redusidi. Ath delà, tanben se poderàn realizar un gran nombre d’activitats totauments gratuïtes coma: entrades as Termes Baronia de Les, Aran Park, Naturaran, ara pista de gèu deth Palai de Gèu, as musèus e ua infinitat d’activitats guidades.
Tanben s’aufrís prètzi especiaus enes viatges damb autobús de Barcelona a Vielha e de Lleida a Vielha, atau coma en restaurants, lotjaments e comèrci deth territòri.
Entà poder reservar ua plaça ath Val d’Aran Mountain Summer, cau entrar ena pagina web ww.aranexperience.com e utilizar eth còdi dera carta de fidelizacion Val d’Aran Card. Es resèrves se poderàn realizar deth 26 de junh a compdar des 00:00 enquiath 28 de junh as 00:00, e i aurà places limitades.
«Val d’Aran Mountain Summer ei ua escadença unica entà conéisher tot çò qu’era Val d’Aran pòt aufrir en ostiu, e a uns prètzi immielhorables. D’aguesta manèra, pendent ua dimenjada, es visitants poderàn descorbir era vasta aufèrta toristica que dispausam a nivèu païsatgistic, culturau, esportiu, gastronomic e comerciau», comente era conselhèra de Torisme, Comèrç e Consum, Anna Díaz.
«Volem, ath delà, premiar era fidelizacion des clients que ja dispausen dera Val d’Aran Card, pr’amor que contunhen d’utilizar-la enes establiments e que descorbisquen es multiples avantatges que supause dispausar d’era pendent tot er an», ahigie Díaz.