• Un nau recors que permeterà milhorar de manèra significativa era experiéncia des visitants e que serà disponible en cinc lengües (aranés, catalan, espanhòu, francés e anglés).

• Aguesta actuacion a estat finançada peth Plan de Sostenibilitat Toristica dera Val d’Aran.

Eth Conselh Generau d’Aran, a trauès deth Hilat de Musèus, presentèc ager deluns  es audioguides der Ecomusèu Çò de Joanchiquet de Vilamòs, un nau recors que permeterà milhorar de manèra significativa era experiéncia des visitants, en tot incorporar contenguts innovadors sus era casa, era familha Aunòs e era forma de vida tradicionau dera Val d’Aran.

Er acte siguec presidit pera sindica d’Aran, Maria Vergés, er alcalde de Vilamòs, Oriol Sala e d’auti conselhèrs deth Conselh Generau d’Aran.

Er Ecomusèu, gestionat peth Conselh Generau d’Aran e proprietat actuau der Ajuntament de Vilamòs, represente un important testimòni dera istòria e dera cultura aranesa. Er abitatge siguec aucupat pendent dètz generacions pera familha Aunòs, segontes era documentacion que remonte ath sègle XVI, e siguec transformat en ecomusèu en 1996.

Es audioguides incorpòren vint-e-tres pistes en cinc lengües (aranés, catalan, espanhòu, francés e anglés) e tres votzes diferents, permetent ua visita personalizada e immersiva. Damb mès d’ua ora de locucions, es contenguts bastissen un viatge ath passat des familhes araneses enquia començaments deth sègle XX.

Eth procès de creacion d’aguesti contenguts a compdat damb ua prigonda recèrca documentau e orau. En aguest sens, eth testimòni de Juanita Aunòs, darrèra ereua dera casa, a estat clau entà reconstituïr era istòria de Çò de Joanchiquet e era vida dera sua familha. Era empresa Insitu, especializada en projèctes culturaus e toristics, a estat era encargada de desvolopar aguest projècte d’audioguides.

Es audioguides ja son disponibles entàs visitants a compdar d’aué, 15 d’abriu. Enquiath dijaus 17, se poderàn utilizar gratuïtaments. Dempús auràn un còst simbolic de 2€, ath delà deth prètz dera entrada. Aguesta actuacion a estat finançada peth Plan de Sostenibilitat Toristica dera Val d’Aran.

Vielha, 15 d’abriu de 2025