Eth Conselh de Direccion deth Servici Aranés de Benèster e Salut a aprovat er expedient de contratacion damb tramitacion d’urgéncia es òbres tara adjudicacion dera prumèra fase dera reforma der Espitau Val d’Aran, num. SABS2014OBR01.

Aguesta prumera fasa s’estructure en dues parts:

1. Ampliament dera planta sosterranh

Ena planta sosterranh s’amplie era zòna de mercaderies enquia arribar en mur que limite eth solar, que se desrocarà en tot arténher ua façada de 14 mètres dauridi ath vessant der arriu Garona e connectada a un nau vial que permeterà er accès de subministraments e era evacuacion de residus.

Er airau agranit ei ua zòna liura damb ua grana dubertura ara façada destinada as veïculs de subministraments e servicis.

2. Nau vial

Eth nau vial discorrerà entre eth mur que limite eth solar der Espitau e era escolhera der arriu Garona e conectarà damb er ampliament dera planta deth sosterranh, en tot perméter atau er accès des veïculs de servici, e recuperar es circuits originaus der Espitau.

Era actuacion d’aguesta prumèra fase ei avalorada en 240.000 èuros.

En paraules deth conselhèr de Salut e Benéster d’Aran, Eduardo Valdecantos, “aguestes òbres son de besonh entà optimizar er espaci d’aguestes installacions”, e a assegurat qu’“ei ua prioritat entath Govèrn mielhorar es condicions des installacions der Espitau entà poder aufrir un bon servici”.