-
Eth govèrn d’Aran lance aguesta naua prepausa entà promòir era creacion e adaptacion de cançons en aranés.
-
Es inscripcions entad aguesta prumèra edicion ja son dubèrtes e eth tèrme de presentacion des òbres se barrarà eth 18 de mai.
Eth Conselh Generau d’Aran anóncie eth lançament deth concors Aranvision 2025, un eveniment destinat a impulsar era creacion e adaptacion musicau en aranés. Aguest concors a coma objectiu promòir er usatge dera lengua pròpria d’Aran ath torn dera musica, cercant que sigue un espaci creatiu e de promocion der aranés.
Bases deth Concors Aravision 2025
Era participacion ei dubèrta a totes aqueres persones que complisquen damb es requisits establidi enes bases. Es participants se poiràn presentar en dues subcategories:
- Subcategoria Joena, destinada a persones d’entre 10 e 17 ans (tostemp que non agen hèt es 18 ans en moment de realizar era inscripcion). En aguest cas, ei de besonh presentar ua autoritzacion escrita deth pair, mair o tutor legau.
- Subcategoria Adulta, destinada a persones de 18 ans o mès.
Es participants poiràn optar a participar de forma individuau o en grop. Aqueri que se presenten en grop poiràn formar part d’un grop d’enquia 6 persones, includidi cantaires, musics e dançaires.
A cada participant se li permeterà presentar ua òbra per categoria, mès pòden concórrer enes dues categories: “Milhor cançon adaptada ar aranés” e “Milhor cançon inedita en aranés”.
Com participar?
Entà participar, es interessats auràn de presentar era següenta documentacion a trauès dera plana web deth Conselh Generau d’Aran:
- Formulari d’inscripcion degudament completat e signat.
- Autorizacion escrita deth pair, mair o tutor legau en cas des menors d’edat.
- Archiu de son en format MP3 dera cançon a presentar.
- Archiu de vidoo en format MP4 dera actuacion prevista tara gala.
- Letra dera cançon en format tèxte.
Eth tèrme de presentacion des òbres serà enquiath 18 de mai de 2025 tàs 12:00 deth meddia.
Eth Conselh Generau d’Aran organizarà era Gala Finau d’Aranvision 2025, que serà en dirècte, laguens des actes previsti pendent ena celebracion deth Hestau Terson, eth dia 16 de junh de 2025 ena tarde.
Entà mès informacion e inscripcions, es interessadi pòden consultar es bases deth concors en: https://aranes.conselharan.org/er-aranes/concorsi-e-premis/