Vielha, 6 d’abriu de 2018.- Un grop d’escolans de 3au d’ESO der Institut d’Ensenyament Secundari de Maçanet de la Selva, en Girona, an visitat pendent uns dies era Val d’Aran, laguens des convivéncies orientadores des dies des vacances escolars de Setmana Santa.

Era visita ara Val d’Aran d’aguesti escolans a estat organizada pera professora der Institut de Maçanet, Rosa Visa Gabernet, que siguec escolana der Institut dera Val d’Aran, en collaboracion damb es responsables der INS d’Aran e eth sòn director, José Manuel Rodríguez.

Pendent era estada, es escolans der IES de Maçanet de la Selva sigueren arrecebudi en Conselh Generau d’Aran peth vicesindic d’Aran, Luís Carlos Medina, que les metec en coneishença dera organizacion institucionau e politica deth Conselh Generau coma maximala institucion des aranesi.

Ena visita ara sedença institucionau, es gojats e gojates assistiren a dues charrades sus er aranés e eth papèr der IEA-Academia aranesa dera lengua occitana, a cargue deth president der IEA-AALO, Jusèp Loís Sans; e ua auta sus era istòria, era identitat e eth hèt diferenciau aranés, ena que er assessor culturau e d’auviatge deth Conselh Generau, Jèp de Montoya, hec ua revision as moments istorics mès importants dera Val d’Aran a compdar dera Edat Mieja.