Vielha 11 d’abriu de 2016.- Ager dimenge ath meddia, era “Orquestra Infantil de les Terres de Lleida” aufric un concèrt ena glèisa de Santa María de Mijaran plen coma un buc, entà escotar es interpretacions musicaus d’aguesti joeni musicians, qu’ath delà compdèren damb era participacion dera Corau Margalida de Bossòst ara ora d’interpretar Montanhes araneses, imne dera Val d’Aran.

Eth concèrt que siguec tot un èxit, includic interpretacions a cargue dera orquèstra sinfonica, entà contunhar damb bandes sonores de pellicules interpretades pera orquèstra d’acordeons, e finalizar toti amassa acompanhadi dera Corau Margalida, en tot interpretar enquia tres còps desparières versions de Montanhes araneses.
Era “Orquestra Infantil de les Terres de Lleida”, dirigida per Sonia Peiró e Albert Gumí, siguec creada pendent eth cors escolar 2011/2012 a compdar dera estreta collaboracion entre eth Conservatòri Professionau de Musicians de Cervera e dera Escòla Municipau de Musiciana de Ponts, damb era participacion tanben des escòles municipaus de musiciana de Bellpuig, Guissona, Oliana, Solsona, Tàrrega, Agramunt e Mollerussa.

Enquiara Val d’Aran, se desplacèren 98 joeni musicians integrants dera “Orquestra Infantil de les Terres de Lleida”.