• A compdar de deman, 6 d’octobre, cada dijaus entàs 22:55 s’emeterà en Lleida TV un nau capitol dera seria, impulsada peth govèrn deth Conselh Generau d’Aran, que cerque prebotjar era normalizacion lingüistica dera nòsta lengua pròpria a trauès dera ficcion e er umor

Deman dijaus, 6 d’octobre, entàs 22:55 ores, aurà lòc era estrea dera naua temporada dera seria en aranés Èm çò qu’èm, impulasda peth govèrn deth Conselh Generau d’Aran dera man de Lleida TV a trauès dera productora audiovisuau Kionalia Project.

“Deth Conselh Generau d’Aran ençà èm plan satisfets d’anonciar era estrea d’aguesta tresau tempsada, ua apòsta creativa entà impulsar era promocion e normalizacion dera nòsta lengua pròpria pr’amor que, a despièch des dificultats damb es que mos trapam entà poder desplegar ua politica lingüistica eficaç entà lutar contra era desaparicion der aranés, consideram indispensable contunhar trabalhant e cercant formules efectives entà apropar era lengua as naues generacions”, afirmaue era sindica d’Aran, Maria Vergés.

Ena sua naua temporada, que constarà de 12 capítols, Èm çò qu’èm apòste pera ficcion e er umor entà prebotjar era normalizacion lingüistica der aranés e, a trauès de diuèrsi gags, tractarà es errors e dubtes mès comuns qu’apareishen en emplec abituau dera lengua pròpria d’Aran, damb era finalitat d’apropar era lengua a un public extens en un format pòc explotat.

Cau rebrembar qu’es dues prumères temporades dera sèrie se pòden veir de franc e ara carta ena web https://lleidatv.alacarta.cat/emcoquem.