Vielha, 7 de març de 2018.- Ua vintea d’estudiants d’Arquitectura dera Universitat Internacionau de Catalonha (UIC), an visitat pendent dus dies era Val d’Aran entà conéisher er auviatge naturau e culturau dera Val d’Aran.

Era visita d’aguesti estudiants ena Val d’Aran a estat promoiguda peth Catedratic e Director dera Escòla Superiora d’Arquitectura dera Universitat Internacionau de Catalonha, Dr. Josep Lluis i Ginovart, e era professora Mònica López Piquer, as que diuèrsi projèctes culturaus e patrimoniaus les junhen des de hè ans damb era Val d’Aran.

Eth grop d’estudiants ac integrauen gojats e gojates de Mexic, Argentina, Colómbia, Bolívia, Eqüador, Itàlia, Espanha e Catalonha, qu’an profitat era dimenjada entà visitar e diboishar diuèrsi lòcs e elements arquitectonics e patrimoniaus deth Baish Aran, Vielha e Mijaran e Naut Aran, ath delà de seguir es explicacions deth Dr. Lluis i Ginovart e der assessor culturau deth Conselh Generau, Jèp de Montoya, que les an permetut conéisher aspèctes importants dera istòria, cultura, lengua e identitat aranesa.

Aguest prumèr contacte d’aguesti estudiants damb er auviatge aranés, seguís ena linha de collaboracion entre era UIC e eth Conselh Generau d’Aran entà dar a conéisher e estudiar er auviatge deth país e auer sufisenta documentacion entara elaboracion der expedient entà que era Val de Aran pogue aspirar a èster arreconeishut Auviatge dera Umanitat per part dera UNESCO.

Eth grop d’estudiants dirigidi peth Dr. Lluis i Ginovart, sigueren arrecebudi en Conselh Generau d’Aran peth sindic, Carlos Barrera, que les convidèc a contunhar en tot hèr mès visites ena Val d’Aran entà conéisher damb detalh er auviatge istoric culturau e qui sap s’entà dar impuls a ua futura Universitat d’Estiu.