Aguesta dimenjada passada se junheren es melhors esquiadors de Catalunya ena categoria U14 en es estacions de La Masella e de La Molina entà disputar eth Trofèu Ciutat de Terrassa/ Campionat de Catalunya d’esquí aupin.

Sigueren 3 dies de grana competicion e sustot de fòrça esquí en ues condicions excepcionaus e a on eth CAEI siguec eth club que mès pòdis artenhec damb un totau de set pòdis que quate ne sigueren entà Carmela Olmo.

Eth prumèr dia damb 30 pòrtes de recorregut ena pista Torrent Negre de La Molina, se diputèren dus Supèr Gigants a on Clara Albert demorèc ena dusau posicion en un d’eri e Carmela artenhec era tresau plaça en es dus. Ena categoria masculina, Pèir Cónsul tanben demorèc tresau.

Eth dissabte, en La Masella, se disputèren 2 manges d’Eslalom ena pista dera Devallada e a on es corredors deth CAEI tornèren a pujar ath pòdi. Elsa Maristany e Carmela Olmo demorèren ena dusau e tresau posicion respectivaments.

E ena tresau jornada d’aguesti campionats Carmela, que hè ua grana sason, se hec damb era victòria en Gigant.

Grana dimenjada d’esquí qu’a demostrat qu’es corredors infantils deth CAEI son en plea forma.

E s’es petiti dera categoria son en plea forma, es U16 non se demoren ath darrèr. Aingeru Garai a estat seleccionat entà disputar eth Trofèu Topolino que se celèbre aguesta setmana en Itàlia e qu’ei considerada era competicion internacionau mès importanta d’aguesta categoria.