• Eth Conselh Generau d’Aran a collaborat damb era Communauté de Communes Pyrénées Haut Garonnaises, eth Consell Comarcal de l’Alta Ribagorça e era Diputación Provincial de Huesca entà impulsar aguest camin, que portarà as pelegrins de Sant Bertrand de Cominges, en tot trauessar era Val d’Aran, era Alta Ribagorça e Òsca enquia connectar damb eth Camin de Sant Jaime catalan

Eth Conselh Generau d’Aran, era Communauté de Communes Pyrénées Haut Garonnaises, eth Consell Comarcal de l’Alta Ribagorça e era Diputación Provincial de Huesca collabòren entà impulsar era marca toristica Camin de Sant Jaime Aran-Pirenèus, que se presentarà oficiaument eth 8 de junh, entàs 12:00 ores, en Bonansa.

Es pelegrins que trauessauen França damb destinacion Sant Jaime de Compostèla auien de trauessar es Pirenèus, e ac hègen principaument pes pòrts de Somport e Roncesvalles, mès tanben per d’autes vies. Un des camins alternatius portaue as peregrins de Saint Bertrand de Comminges, seguint er arriu Garona, enquia arribar ara Val d’Aran e contunhant eth camin enquia Berbegal, a on agarrauen eth Camin de Sant Jaime catalán.

Era idea de recuperar aguest camin desbrembat pes pelegrins, mès qu’a mantengut era connexion entre es territòris vesins, se presente coma ua oportunitat de desvolopament toristic e sociau entad aguesti territòris. Es preocupacions e rèptes comuns e er interès per auançar enquia naues alternatives de progrés portèren ath Conselh Generau d’Aran, era Communauté de Communes Pyrénées Haut Garonnaises, eth Consell Comarcal de l’Alta Ribagorça e era Diputación Provincial de Huesca a iniciar ua collaboracion que se demore que pogue mantenguer-se damb eth temps tanben en d’auti projèctes.

Pendent es darrèri mesi s’an amiat a tèrme trabalhs de senhalizacion e condicionament deth recorrut, enes qu’an participat era Associacion d’Amics deth Camin de Sant Jaime dera Val d’Aran e era Associación Oscense de Amigos del Camino de Santiago. Ath delà s’a desvolopat ua plana web pròpria que facilite ath usatgèr autant era informacion sus eth recorrut coma es servicis disponibles.

Era creacion d’aguesta naua marca toristica a implicat tanben eth dessenh d’un logotip, que se place enes plaques des establiments aderidi, ena credenciau des pelegrins e enes sagèths entàs lotjaments.

Recorrut deth Camin de Sant Jaime Aran-Pirenèus

En sòn inici, en tot partir de Saint Bertrand de Comminges, era rota auance parallèlament ar arriu Garona e trauèsse era Val d’Aran, en tot passar pes localitats de Les, Bossòst e Vielha. Dempús, en tot auer superat es Pirenèus peth pòrt de Vielha, auance pera Val de Barrabés, dejà ena Alta Ribagorça, enquia Vilaller.

Ara seguida puje enquia Montanuy e Bonansa e progrèsse pera val d’Isábena enquia Graus. Dempús de Torreciudad e Barbastro, arribe ara localitat de Berbegal, a on s’amasse damb eth Camin de Sant Jaime catalan que ven de Montserrat.

Er itinerari ei totaument senhalizat damb es marques des sensens de Gran Recorrut (GR-11 e es sues variants ena Val d’Aran, e GR-17 enes trams dera Alta Ribagorça catalana e Òsca).

Eth camin entre Saint Bertrand de Comminges e Berbegal cònste de 14 etapes  que somen 246,50 km de recorrut cargadi d’istòria. Se visiten jòies patrimoniaus coma era catedral de Saint Bertrand, era glèisa romanica de Bossòst, eth nuclèu antic de Vilaller, eth conjunt monumentau de Roda de Isábena o eth monasteri romanic d’Obarra, amassa damb eth cors fluviau deth Garona, era Noguera Ribagorzana e Isábena, sense desbrembar es paisatges pirenencs, entre d’auti atractius que sorpreneràn, pas a pas, en tot caminar.