Er aspirant ara presidéncia dera RFEDI, May Peus España, a presentat aué en Conselh Generau d’Aran eth sòn programa entàs eleccions que decidiràn eth futur des espòrts d’iuèrn espanhòu e que se celebraràn eth 20 de seteme

Eth govèrn d’Aran ath complèrt damb eth sindic d’Aran, Carlos Barrera, en tot dar eth sòn supòrt ath candidat aranés ara presidéncia dera RFEDI, May Peus España.

May Peus España realizèc ager en Madrid era presentacion des avals de besonh entà presentar-se coma candidat tà president dera RFEDI. Entre eth deluns 1 e eth dimèrcles 3 de seteme ei eth periòde establit peth reglament electorau entara presentacion de candidatures que concorreràn as eleccions entath periòde 2014-2018. Era campanha electorau s’alongarà enquiath dia 20 de seteme eth qué se realizaràn es eleccions.

Aué er aranés, May Peus, a presentat en Conselh Generau d’Aran es principaus eishi deth sòn illusionant projècte. Er acte a compdat damb era preséncia deth conselhèr d’Espòrts d’Aran, Marcos Viló, eth conselhèr de Governacion d’Aran, Frances Medan, eth president dera FCEH, Óscar Cruz, atau coma representants de diferenti clubs esportius d’Aran qu’an mostrat eth sòn supòrt ath candidat aranés.

Peus España a explicat que “dempús d’ans d’ua sensacion omnipresent d’abséncia d’objectius clari e donques, de projècte enes espòrts d’iuèrn en Espanha, eth projècte dera mia equipa a neishut damb eth besonh de melhorar eth present, mejançant era coneishença dera realitat actuau e era preparacion entà abordar eth contèxt futur”.

Aguest aranés enamorat dera nhèu, que hec part dera equipa nacionau enes 90, a explicat damb claretat qu’ “era prioritat estrategica vire entorn deth desvolopament economic e de gestion d’aguesta Federacion coma motor d’un plan ambiciós e estable de lideratge des espòrts d’iuèrn. Compdam damb es melhors recorsi umans entà actuar damb operativitat e eficiéncia sus eth terren, en tot desvolopar es fortaleses e oportunitats des nòstes disciplines latents”.

Eth desvolopament economic coma motor deth projècte

Es 4 grani eishi deth projècte (desvolopament economic, deth naut rendiment, esportiu e des persones) que presente era equipa dirigida per May Peus se caracterizen peth sòn realisme economic ath madeish temps qu’ua fòrta ambicion esportiua. Per çò qu’ei de les finances dera RFEDI, se destaque qu’aguesta ei era intencion prioritària a cuert e miei termini coma eth pilar fonamentau d’un plan d’accion qu’aten as indicacions deth Conselh Superior d’Espòrts (CSD). En cicle 2014-2018 se cerque arténher es recorsi de besonh entà amiar a tèrme es intencions esportiues deth Plan Estrategic.

Se dessenhe un plan de sanejament economic dera RFEDI, que permete amortizar eth deute actuau, sense perjudici entath programa esportiu, mejançant diuèrses accions de priorizacion e reduccion dera despena d’autes partides. Per un aute costat, er aute gran shivau de batalha enes numeròs serà aumentar eth 40% eth Pressupòst Ordinari deth CSD, atau coma eth 30% enes recorsi pròpis, mejançant ua melhora dera avaloracion der acompliment associatiu, organizatiu, gestor e mès que mès er esportiu.

Espòrt e persones, era anima dera estrategia

Er aspirant a president a clar, dempús de mès de 20 ans coma entrenador e gestor d’un club, qu’er espòrt ei un estrument basic entà forjar as persones. Eth desvolopament esportiu deth projècte bascula entre eth Naut Rendiment e eth Desvolopament der Espòrt des dera basa. En aguest sens eth Naut Rendiment se desvoloparà es quate Airaus Estrategics d’Intervencion: Equipes e seleccions nacionaus, centres de tecnificacion, formacion e R+D+i.

En çò que tanh ath desvolopament des espòrts d’iuèrn se trabalharà entà aumentar es licéncies esportiues enquia 40% en periòde enquiath 2018, promòir era universalizacion des espòrts de nhèu era coordinacion damb es Federacions Autonomiques e plaçar Espanha coma un des principaus organizadors de competicions de nivèu internacionau. Tanben s’incidís a difóner es espòrts d’iuèrn a trauès dera web 2.0 e hilats sociaus entà arribar melhor a un public joen.

Per çò qu’ei deth Desvolopament des Persones, demore clar que se cau establir ua estructura organizativa e administrativa eficienta, modèrna e plan dimensionada que s’ajuste as demanes dera RFEDI, en tot basar-se ena planificacion, en tot complir terminis e eth dialòg. Desvolopar nòrmes e protocòus que faciliten e donguen eficiéncia ara labor jornalièra de toti, en tot actualizar-les oportunaments. Arténher un naut grad de benestar e satisfaccion des protagonistes (esportistes, administracion, pairs, estacions) des espòrts d’iuèrn.