Aué dimèrcles, 3 de deseme, s’a presentat ena sedença deth Conselh Generau d’Aran era naua web deth Centre de Lauegi d’Aran ena qu’an estat presents era conselhèra de Torisme e Desvolopament Economic d’Aran, Anna Díaz, eth responsable deth Centre de Lauegi d’Aran, Jordi Gavaldà, e eth dessenhaire dera web, Kike Pedraza, dera empresa ÒC STUDIO.

Era Val d’Aran dispause des de hè 27 ans d’un tecnic de lauegi, ena sason 2003/2004, s’incorporèc un dusau tecnic e tant es activitats coma es productes restacadi damb era seguretat e es lauegi que se genèren des deth Conselh Generau d’Aran an anat creishent. Ena sason 2010/2011 se contractèc a un tresau membre dera equipa, damb un perfil mès scientific, damb era idèa de potenciar era investigacion aplicada. Açò culminèc damb era creacion deth Centre de Lauegi d’Aran.

Tant pes sues caracteristiques climatiques coma orografiques, era Val d’Aran ei afectada extensaments peth risc de lauegi. S’a calculat qu’, apuprètz, eth 51% deth sòn territòri se trape expausat ad aguest fenomèn. Bères carretères (coma era deth Pòrt dera Bonaigua), nombroses pistes forestaus e bèri pòbles e infrastructures pòden èster afectades per lauegi mès o mens excepcionaus.

Era conselhèra de Torisme e Desvolopament Economic d’Aran, Anna Díaz, a manifestat “cada còp, mès visitants accedissen a zònes de nauta montanha pendent es mesi d’iuèrn, ja sigue damb esquís de montanha, surf de montanha, raquetes o mòtos de nhèu. Damb era naua web quinsevolha persona, abans de hèr ua gessuda pera montanha, poderà accedir a tota era informacion deth terren d’ua manèra simpla”.

Díaz a hijut “damb aguesta naua web volem garantir era seguretat des persones”.

Eth Centre de Lauegi d’Aran s’a assolidat coma ua unitat damb un naut grad d’especializacion, que genère productes e servicis de grana utilitat, non sonque peth pròpri Conselh Generau d’Aran se non tanben per d’autes administracions, coma ena redaccion deth “Plan especiau d’Emergéncies per lauegi en Catalonha- ALLAUCAT”, en quau i participe coma organisme expèrt ena matèria de lauegi e ena analisi dera estabilitat deth mantèu de nhèu e risqui associadi amassa damb er Institut Geologic de Catalonha.

“Eth Centre de Lauegi d’Aran ei eth centre de prediccion, cartografia e gestion deth risc de lauegi e coma unitat de recèrca e desvolopament (R+D) en nivologia e lauegi, laguens der encastre de competéncies deth Conselh Generau d’Aran” a manifestat eth tecnic deth Centre de Lauegi d’Aran, Jordi Gavaldà.

Pera sua part, eth dessenhaire dera naua web deth Centre, Kike Pedraza d’ÒC STUDIO, a soslinhat “en tractar-se d’un lòc web damb informacion restacada damb era seguretat deth ciutadan, s’a priorizat era accessibilitat, en tot facilitar er accès as donades sensibles d’ua forma clara e optimizant era visualizacion entà quinsevolh tipe de dispositiu. Tanben dispause dera darrèra tecnologia ena sua estructura, enquadrada en un dessenh actuau e institucionau.”

Es foncions deth Centre de Lauegi d’Aran son es seguentes entà cadun des airaus d’accion:

1. Prediccion de lauegi
2. Cartografia de lauegi
3. Recèrca e desvolopament
4. Divulgacion

Eth Centre de Lauegi d’Aran ei plaçat en CEEI Casau.

Podetz visitar era web en:
http://lauegi.conselharan.org/