• Eth nau lòc web deth Centre de Lauegi aufrís informacion diària en sèt lengues sus eth risc de lauegi en territòri, condicions meteorologiques, estat des pistes forestaus e materiau divulgatiu e educatiu, entre d’auti ahèrs

Eth Centre de Lauegi deth Conselh Generau d’Aran compde dejà damb ua naua plana web, disponible en sèt idiòmes (aranés, catalan, castelhan, anglés, francés, aleman e italian) e qu’aufrís eth bulletin de lauegi diari entàs 17:00 ores damb actualizacion entàs 08:00 ores.

Aguesta web compde tanben damb un mapa interactiu dera Val d’Aran damb distribucion deth grad de perilh de lauegi per còta e sub-region (Aran nòrd e centre, limit sud, vals de Molières e Conangles), s’era situacion ac requerís. Ath delà, s’actualize setmanaument eth blòg damb entrades sus era situacion de lauegi presents e d’auti tèmes divulgatius, e i a un apartat educatiu damb contenguts basics de seguretat en terren de lauegi e explicacion des concèptes e tèrmes basics entà interpretar eth bulletin d’lauegi.

Se pòt trapar tanben er archiu istoric des bulletins e es previsions meteorologiques de MeteoAran, atau coma accès as donades des estacions meteorologiques, perfils e tèsts, e estat des pistes forestaus.

Ua web fòrça dinamica e actualizada diariament qu’a estat desvolopada de manèra conjunta damb es Servicis Informatics deth Conselh Generau d’Aran e era empresa locau Maladeta Studio.