Vielha, 10 d’octobre de 2018.- Es tecnicians deth Centre de prediccion de Lauegi deth Conselh Generau d’Aran participen entre eth 7 e eth 12 d’octobre en International Snow Science Workshop 2018 que se celèbre ena ciutat austriana d’Innsbruck.

Eth ISSW (International Snow Science Workshop) ei era conferéncia mès grana deth mon sus nhèu e lauegi qu’a diferéncia de quinsevolh aute simpòsi promò un escambi internacionau e interdisciplinari entre expèrts dera nhèu, damb tematiques coma es auanci actuaus ena sciéncia dera nhèu e es lauegi, es estudis de cas e es tecnologies innovadores a nivèu internacionau.

Era conferéncia, ara qu’assistissen ath torn de 1.000 participaires de tot eth mon, prepause diferenti formats de presentacion, coma presentacions oraus e de pòster, taules redones, atau coma era integracion d’ua exposicion internacionau, que permeten ua interaccion dirècta entre eth public assistent.

Es tèmes generaus deth ISSW includissen mesures de proteccion, pronostic e dinamica de lauegi, maneig dera nhèu, atau coma estrategies de guida, rescat e risc. Ath delà, eth ISSW 2018 s’enfoque en tèmes especiaus coma “Solucions integraus d’engenharia”, “Accidents de laueg” e “Prene decisions sus eth terren”. Ath delà, per prumèr còp, eth congrès aufrís corsi de capacitacion entà toti es participaires interessadi.

Es intervencions des tecnicians deth Centre de prediccion de Lauegi deth Conselh Generau d’Aran ath ISSW 2018, seràn es de Jordi Gavaldà, sus “Reanalisi d’accidents de lauegi recents ena Val d’Aran: Ua comunicacion de provocacion entà diferenti grops d’usatgèrs”; Ivan Moner, sus “Mapeig ATES e Laueg. Problèmes enes accidents de lauegi e Close-calls ena Val d’Aran”; e “Exposicion deth terren enes lauegi, cartografia a escala enes Pirenèus: Un projècte en expansion” a cargue de Montse Bacardit.