Vielha, 7 de seteme de 2018.- Eth Centre de Recorsi Pedagogics dera Val d’Aran – Nauta Ribagòrça a organizat a peticion des docents dera Val d’Aran un cors de formacion sus era experiéncia minera en Aran, damb visites ara Mina Victòria e as mines de Liat.

Aguesta setmana un grop de vint professors der INS d’Aran e des escòles de primària dera Val d’Aran, acompanhadi per tecnicians deth Conselh Generau d’Aran, an participat en aguest cors en tot visitar es installacions dera Mina Victòria, que se completarà eth pròplèu 20 d’en octobre damb ua visita as mines de Liat.

Eth cors organizat peth Centre de Recorsi Pedagogics permet as professors, a trauès des explicacions d’Elisa Ros, responsabla der Airau d’Auviatge Culturau deth Conselh Generau d’Aran, e de Jordi Gavaldà, geòleg deth Conselh Generau, arténher diuèrses coneishences sus es aspèctes geologics dera Val d’Aran e des mines, atau coma era istòria dera mineria en Aran e de com se desvolopaue eth dia a dia entà hèr era extraccion de mineraus.

Cau arrebrembar qu’era Val d´Aran a estat istoricaments ua zòna d’extraccion de mineraus. A principis deth sègle XX s’inicièc era explotacion deth minerau de zinc ena zòna d’Arres e de Bossòst.

Er an 1912, era Mina Victòria ja ère en plea explotacion, e s’extrège ath torn de ueitanta tones de minerau brut per dia, e se metec en foncionament un lauader de mineraus en Bossòst. Ena mina trabalhauen entre 100 e 150 persones, repartides entre er interior e er exterior des galaries.

En esclatar era Guèrra Civiu (1936-1939), se suspeneren es trabalhs. Er an 1949 se reinicièc era explotacion, enquiath 1953, quan era baishada deth prètz deth zinc e era fauta de man d’òbra provoquèren eth barrament definitiu des mines.

Eth 2004 eth Conselh Generatz d’Aran dauric ath public era Mina Victòria dempús de recuperar e restaurar part des sues infrastructures e pr’amor se podessen visitar. En tractar-se d’ua explotacion minera de nauta montanha, se prepausèc era visita coma ua rota de senderisme, a on eth païsatge e er entorn complèten es atractius qu’apòrte era visita ara explotacion minera.

Eth Centre de Recorsi Pedagogics dera Val d’Aran – Nauta Ribagòrça ja hè 5 ans qu’organize aguesti corsi en collaboracion damb eth Conselh Generau d’Aran e es centres educatius aranesi.