• Eth programa deth Conselh Generau a coma objectiu annau èster ua plataforma excellenta entath desvolopament esportiu e personau des joeni esportistes dera Val d’Aran.

Dempús de mesi intensi de trabalh ena nhèu e en gimnàs, de formacion tecnica, de seguiment fisic e tanben de moments de convivença, es joeni esportistes des disciplines d’esquí aupin, esquí de hons, snowboard, freestyle e freeride an finalizat aguesta fasa deth sua vida esportiva.

Un programa pensat tà combinar era practica d’espòrt de naut rendiment damb era formacion academica, en tot facilitar un modèl educatiu duau que met era persona en èish centrau.

En aguesta sason, eth supòrt incondicionau des Clubs aranesi, Baqueira Beret, Palai de Gèu, Aran Salut e er INS Aran a estat clau entà poder arténher es objectius fixadi. Tanben eth compromís des tecnics responsables des disciplines e des familhes que, dia a dia, hèn possible que cadun d’aguesti joeni e joenes poguen créisher damb valors, autonomia e esperit de superacion.

Era darrèra jornada se barraue damb ua session fisica conjunta laguens deth territòri. Ara seguida se trasladauen entara sedença deth Conselh Generau d’Aran, a on se hec un reconeishement des merits artenhudi e s’encoratjaue as esportistes a trebalhar damb  constància enes sòns clubs d’origina en tot combinar era formacion esportiva, educativa e personau.

#AranEnMoviment #ConselhGenerauAran #ValDAran #Pirineus #FCEH #RFEDI #EsportCAT #Seguim

Vielha, 16 d’abriu 2025