Era sedença deth Conselh Generau d’Aran a acuelhut un an mès era presentacion oficiau des equipes d’esquí de hons e de ciclisme de Vitaldent Aran.
Eth maximal responsable de Vitaldent Aran Manu Caseny, profitèc er acte de presentacion entà explicar quauqui des rèptes que vò afrontar era equipa en aguesta naua sason, sense pèrder era esséncia des sasons anteriores qu’an permetut assolidar es equipes e tractar d’arténher naues mètes damb eth supòrt des der an 2007 de Massi coma esponsòr, e des der an 2009 damb Vitaldent.
Entad aguesta sason era equipa d’esquí de hons a previst concórrer en pròves deth campionat d’Euròpa, entre eres dues carrères deth Circuit Euroloppet prealables ara 37 ª edicion dera Marxa Beret, qu’aurà lòc es pròplèus 6 e 7 de hereuèr de 2016 ena estacion de Baqueira-Beret.
Pera sua part era equipa ciclista mantierà era participacion en pròves de desparières categories coma es de mastèrs, cabdets, sub-23, e en contorn professionau es corredors de Vitaldent Aran concorreràn enes granes carrères continentaus.
Es hites cada an son mès importants e mès professionaus, ei per açò qu’enguan “mos centraram enes competicions mès importantes e ath madeish temps daram era oportunitat entà que es mès joeni dera equipa poguen concórrer”, soslinhèc Caseny.
Era presentacion oficiau dera sason siguec a cargue deth vicesindic d’Aran e conselhèr d’Espòrts e Joenessa Luís Carlos Medina, qu’en nòm deth Conselh Generau d’Aran volec “arregraïr er esfòrç e era dedicacion des esportistes de Vitaldent Aran e manifestèc un còp mès tot eth supòrt dera maxima institucion aranesa cap ad aguest projècte esportiu”. En acte de presentacion tanben participèren, Nicolás Sisinni per part de Vitaldent e Luís Oulego, responsabla comerciau de Massi, toti eri acompanhadi des integrants des equipes de hons e ciclista de Vitaldent Aran.
