Eth ciclista aranés, Ruben Caseny, viatge aué tà Shanghai a on participarà en Tour de Thaiu Lake un torn de nau dies, deth 31 d’octobre ath 8 de noveme, a on era equipa START-MASSI se presente damb er objectiu de melhorar eth resultat d’est an passat a on artenheren acabar ena tresau posicion per equipes, deuant d’esquadres tan potentes coma Amore & Vita, Giant-Campion Sistem, e uns auti.

Ath costat de Caseny viatgen eth ciclista lheidatan, Marc Vilanova, er alacantí Axel Còsta, que damb er ongrés Zsolt Derm, eth mexican Ulisses Castillo, e er alemand, Andreas Keuser, completaràn era equipa.
Dempús d’aguest torn, se desplaçaràn tara ciutat de Yancheng a on tanben participaràn en Tour of Yancheng Costal Wetlands, un torn de dus dies (10 e 11 de noveme).

Ruben Caseny, signèc un convèni damb eth Conselh Generau d’Aran entà promòir era destinacion toristica esportiua Val d’Aran peth mon, representada ena imatge e enes valors deth ciclista. “Qui melhor qu’es nòsti joeni esportistes professionaus aranesi entà representar eth nòste país e eth sentiment d’identitat” manifestèc Carlos Barrera, sindic d’Aran.