Vielha, 22 de mai de 2017.- Eth Club Curling Val d’Aran Montcorbison, a artenhut era tresau posicion, medalha de bronze, dera 2au edicion dera Liga Espanha de Curling.

Era equipa Val d’Aran Montcorbison, format per Héctor Manero, Adrián Manero, Jesús Manero e Marc Barés, derrotèc en un agònic partit ath Curling CH Jaca entà penjar-se era medalha de bronze dempús d’un take out impossible deth CH Jaca en sòn darrèr lançament que non li gessec, açò dèc ath Val d’Aran Moncorbison era victòria per 4-3. Era equipa aranesa sabec mòir-se en un jòc damb fòrça pèires e guardies, e arténher eth tresau lòc deth pòdium.

Era classificacion finau dera Liga Espanha a estat: Txuri-Berri Estébanez (10 punts), Barcelona CC Shaw (6 punts), Val d’Aran Montcorbison (5 punts), CH Jaca (5 punts), Madrid B52 (2 punts) e Curling Puigcerdà Pànxing (2 punts).

Eth vicesindic d’Aran e conselhèr d’Espòrts, Luís Carlos Medina a volut felicitar un còp mès ath Club Curling Val d’Aran Montcorbison pes èxits artenhudi, dejà qu’eth tresau lòc d’enguan se some ara dusau posicion artenhuda en 2016.

Hònt e fòto: hammerspain.com