Vielha, 6 de junh de 2019.- Eth pròplèu dissabte 8 de junh eth Conselh Generau d’Aran en marc dera Hèsta d’Aran, organize er acte de liurament des Prèmis Literaris XXIX Mn. Condò Sambeat, XIXau edicion deth Prèmi Aran de Literatura, XIIau Concors de Diboish ena Escòla e XIIau Hestivau de Teatre ena Escòla.

Enguan era serada deth liurament des prèmis serà dedicada ath poèta Mn. Condò Sambeat a l’escasença deth centenari dera sua mòrt.

Pendent tot er an 2019, eth departament de Cultura e Lengua deth Conselh Generau d’Aran a organizat ua seria d’accions e actes entà commemorar eth centenari dera mòrt de Jusèp Condò Sambeat (1867-1919), coma era emission des “Tastets de Cultura”, 14 micro espacis radiofonics damb tèxtes de Condò prepausadi peth madeish departament en collaboracion damb eth programa de ràdio “Eth Maitin d’Aran” dera CCMA; un espaci ena web deth Conselh Generau d’Aran dedicat a Mn. Condò Sambeat damb desparières prepauses qu’arrebremben ath poèta e escrivan aranés coma “Era isla des diamants” en pdf interactiu (version originau e normalizada); e un quadèrn didactic damb illustracions de Thor Sanabria entà dar a conéisher a Condò enes escòles.

Tanben cau destacar era conferéncia “Mission complida” sus era figura umana de Mn. Condò a cargue de Mn. Amiell deth dia de Sant Jòrdi eth passat 23 d’abriu.

Er acte de liurament des Prèmis Literaris XXIX Mn. Condò Sambeat aurà lòc eth dissabte dia 8 de junh ena glèisa de Mijaran.