• Totes es persones que volguen participar ena elaboracion d’aguest document poiràn formar part dera Comission Participativa que s’amassarà virtuaument eth pròplèu dijaus

Eth Conselh Generau d’Aran a iniciat, damb era collaboracion dera Agéncia Catalana de Joventut e er Observatòri Noctámbul@s, un procès entà elaborar un Plan d’Accion e un Protocòl d’actuacion deuant es violéncies sexuaus enes espacis hestius dera Val d’Aran.

Er objectiu d’aguest protocòl ei arténher espacis d’òci segur e liures de violéncies masclistes, pr’amor qu’en aguesti contèxtes se produsissen un percentatge elevat d’agressions sexuaus a hemnes.

Eth govèrn deth Conselh Generau d’Aran vò qu’era elaboracion d’aguest document sigue çò de mès dubèrt possible e, pr’amor d’açò, totes es persones interessades que i volguen participar, poderàn formar part dera Comission Participativa, ena que se trabalharàn e identificaràn es aspèctes a definir en protocòl.

Aguesta comission definirà es accions basiques deth Plan d’Accion e es sues prepauses auràn ua responsa deth govèrn ena darrèra fasa de validacion deth document finau.

Totes es persones e collectius interessadi en formar part d’aguesta Comission poiràn participar eth pròplèu dijaus 18 de junh, tàs 18 ores, via Google Meets, ena prumèra amassada que s’amiarà a tèrme. Entà poder participar, sonque ei de besonh inscriuer-se en següent formulari: https://forms.gle/MtH5KUowTV6u1yvb9.