• Entath govèrn aranés aguest ère un ahèr prioritari e, gràcies ath trabalh amiat a tèrme peth sindic d’Aran damb era Secretaria General de Polítiques Digitals i Administració Pública dera Generalitat, s’a artenhut un auanç digitau e tecnologic de fòrça importància entath territori

Eth sindic d’Aran, Francés Boya, e es alcaldes des municipis aranesi s’an amassat aué damb eth secretari general de Polítiques Digitals i Administració Pública dera Generalitat, Xavier Gatius i Garriga. Pendent aguesta amassada s’a anonciat qu’era fibra optica publica arribarà en Aran pendent es mesi de seteme e octobre d’enguan, tres ans abans de çò qu’establien es previsions de desplegament.

Era arribada dera fibra optica, segontes a explicat eth sindic d’Aran, “permeterà auer competéncia entre es operadores de tal forma qu’eth prètz dera connexion serà mès barat e permeterà tanben auer totes es prestacions deth 4G e 5G quan sigue disponible era tecnologia”, e a hijut que “aguest auanç daurís un nau paradigma des deth punt de vista dera economia e dera capacitat de qu’empreses innovadores qu’agen de besonh aguest tipe d’infraestructura tecnologica tà poder-se desvolopar se poguen establir en Aran”.

Era Generalitat de Catalunya realizarà ua inversion deth torn de 2,5 milions d’euros entara òbra de connexion qu’anarà d’Esterri enquia Vielha. Pera sua part, eth govèrn aranés assomirà es despenes des trabalhs entà hèr arribar aguest servici enquia Les e aquiu connectar-la damb era fibra francesa, de forma qu’auram ua fibra redondant e, per tant, non serà expausada as problèmes de talhs que s’an viscut enquiara.

Era connexion damb França s’amiarà a tèrme a trauès deth projècte Transgarona, eth camin que transcorrerà eth torn der arriu Garona en tot júnher eth nòste territòri damb França e qu’ara ei en fasa de licitacion.