• Pendent era amassada ordinària deth Conselh d’Alcaldes amiada a tèrme eth passat diuendres ena sedença deth Conselh Generau d’Aran, es alcaldes e alcaldesses aranesi ratifiquèren eth sòn supòrt ara candidatura olimpica deth Pirenèu atau coma ath posicionament dera maxima insitucion aranesa en aguest ahèr

Eth passat diuendres, 28 de gèr, auec lòc era amassada deth Conselh d’Alcaldes dera Val d’Aran ena sedença deth Conselh Generau d’Aran, ena que se tractèren diuèrsi ahèrs d’interès entàs Ajuntaments e EMD deth territòri.

Per un costat, se dec compde der estat dera candidatura des Jòcs Olimpics d’iuèrn enes Pirenèus tà 2030, punt en quau es alcaldes e alcaldesses des municipis e EMD ratifiquèren eth sòn supòrt ara candidatura olimpica e ath posicionament dera maxima institucion aranesa en aguest ahèr.

“Deth govèrn deth Conselh Generau d’Aran ençà èm fòrça arregraïts peth supòrt des Ajuntaments e EMD dera Val d’Aran en tot çò qu’a que veir damb era candidatura des JJOO de 2030, en tot demostrar eth compromís deth nòste territòri damb aguest projècte” asseguraue era sindica d’Aran, Maria Vergés, en tot híger  que: “toti nosati èm conscients qu’ua oportunitat d’aguestes dimensions ajudarie a generar er impuls en desvolopament sociau e territoriau qu’eth Pirenèu a de besonh entà projectar-se coma un territòri de referéncia e demostrar atau era nòsta capacitat non sonque entà organizar eveniments d’aguestes caracteristiques, senon, tanben, entà innovar e melhorar era qualitat de vida des persones que viuen aciu”.

Pendent aguesta amassada se tractèren tanben d’auti ahèrs coma evolucion deth projècte de gestion forestau, er estat actuau dera proteccion des béns culturaus deth territòri o sus es oportunitats de finançament des Hons Europèus.