Era Val d’Aran a entrat a formar part deth territòri LEADER laguens deth marc deth Programa de Desvolopament Rurau (PDR) de Catalonha 2014-2020. Eth programa Leader son ajudes europèes damb er objectiu de fomentar eth desvolopament locau des zònes ruraus, ajuts destinats majoritariament a empresaris e emprenedors deth territòri.

Era Val d’Aran s’a aderit ath Grop d’Accion Locau Consòrci Leader Pirenèu Occidentau qu’ei er organ gestor des ajudes Leader en Pallars Jussà, Pallars Sobirà, Alta Ribagorça e des d’enguan tanben en Aran.

Era metodologia Leader ei ua metodologia ascendent, a on es decisions se prenen des de cada territòri. Ara madeish se trabalhe ena naua Estrategia de Desvolopament Locau (EDL) e eth corresponent procès participatiu que mercarà es èishi principaus enes qué se basarà era pròpria estrategia deth Grop Leader entàs pròplèus 6 ans.

Per aguest motiu, era sedença deth Conselh Generau d’Aran a acuelhut aué, dia 2 de junh, era jornada participatiua qu’a compdat damb era preséncia dera conselhèra de Torisme, Comèrç e Consum d’Aran en foncions, Anna Díaz, qu’a manifestat “damb aguesta jornada volem implicar as aranesi en desvolopament deth nòste territòri, mejançant ua estrategia basada en foment des nòsti potencials e recursi”.

Eth dijaus, dia 4 de junh entàs 12h00 en Conselh Generau d’Aran, se realizarà era jornada destinada as joeni e as hemnes, es sectors des zònes ruraus de mès interès segons era Union Europèa.