• Era sedença deth govèrn aranés a estat er scenari dera presentacion dera sèria en aranés, impulsada peth Conselh Generau d’Aran, que s’emeterà a compdar de deman, 3 d’octobre, cada dijaus entàs 22.55h, en Lleida TV.

Eth Conselh Generau d’Aran a acuelhut aguesta tarde era presentacion dera naua tempsada dera sèria en aranés Èm çò qu’èm, impulsada peth govèrn aranés amassa damb Lleida TV a trauès dera productora audiovisuau Kionalia Project.

Er acte a estat presidit pera sindica d’Aran, Maria Vergés, e a compdat damb era preséncia de representants dera productora e d’actors e actores dera sèria.

“Deth Conselh Generau ençà èm fòrça satisfèts de presentar dejà era cincau tempsada d’aguest projècte, que servís entà hèr a conéisher era lengua pròpria d’Aran des d’ua perspectiva creativa entara promocion e normalizacion der aranés e sajar, damb aguestes naues formules, d’apropar era nòsta lengua tàs naues generacions”, soslinhaue era sindica, Maria Vergés.

Era naua tempsada, que cònste de 12 capítols, se base ena ficcion e er umor tara normalizacion dera nòsta lengua, damb gags que tracten es errors e dobtes mès comuns der aranés.

Es prumères tempsades se pòden seguir a trauès dera plataforma de Lleida TV: https://ott.lleidatv.cat/ca/f/f753e3a6-89b4-45a9-8a1d-7f796728f9a5.

Com cada an, se harà difusion a trauès de La Xarxa, que se distribuirà pes televisions locaus ua setmana dempús dera estrea en Lleida TV. Entre es televisions a on s’emeteràn i é Betevé, eth canau public de Barcelona.

Vielha, 2 d’octobre de 2024