Vielha, 28 de gèr de 2019.- Eth plen deth Conselh Generau d’Aran a aprovat aué per unanimitat era aprobacion iniciau dera Ordenança reguladora dera taxa entara expedicion de permisi, licéncies e concorsi de pesca recreativa ena Val d’Aran.

Eth sindic d’Aran, Carlos Barrera, expliquèc en finalizar eth plen que damb eth traspàs de competéncies en matèria de caça e pesca era administracion competenta ena tramitacion de licéncies de caça e pesca en Aran ei eth Conselh Generau d’Aran, e que s’a observat qu’en aguesti darrèri ans a creishut era tramitacion de licéncies per via telematica e qu’es ingrèssi d’aguesta taxa anauen dirèctaments ara Generalitat de Catalonha, en tot pèrder eth Conselh Generau d’Aran era capacitat de requectar es sòs provenenti des licéncies de pesca.

Eth sindic d’Aran a manifestat que çò qu’a aprovat aué eth plen deth Conselh Generau d’Aran ei era creacion dera licéncia de pesca aranesa qu’autorizarà as pescadors aranesi entà poder pescar damb aguest document ena Val d’Aran e que quan gesseràn a pescar dehòra deth territòri aranés auràn de besonh era licéncia de pesca catalana coma succedirà ara inversa entàs pescadors de dehòra dera Val d’Aran.

Es licéncies dera Val d’Aran coïncidissen totes damb es madeishes que concedís era Generalitat de Catalonha atau coma eth regim sancionador entàs pescadors que realizen era activitat sense licéncia.

Cau auer en compde qu’eth Conselh Generau d’Aran assumís es còsti dera repoblacion damb elicoptèr des lacs e estanhs dera Val d’Aran, dera gestion des arrius aranesi, des pesques electriques, scientifiques e repoblacions, e qu’es Societats de Caça e Pesca dera Val d’Aran arreceben ua ajuda de 15.000 € annaus atau coma es associacions ramaderes deth país. Era practica totalitat des ingrèssi deth Conselh Generau d’Aran pera concession de licéncies retornen enes societats de pesca d’Aran, afirmèc Carlos Barrera.

En aguest sens eth sindic d’Aran, a soslinhat qu’eth Conselh Generau d’Aran concedic en 2017 un totau de 788 licéncies de pesca recreativa per un impòrt de 15.318,00 €, deth temps qu’en 2018 es licéncies sigueren 691 per un impòrt de 14.132,00 €.

Fin finau, eth sindic d’Aran expliquèc qu’eth Conselh Generau d’Aran a comptabilizadi ath torn d’uns 400 caçaires e pescadors ena Val d’Aran.

Eth Conselh Generau d’Aran comunicarà er acòrd deth plen as Societats de Caça e Pesca dera Val d’Aran atau coma ara Federacion Catalana de Pesca Esportiua e Casting e ath Departament d’Agricultura, Ramaderia, Pesca e Alimentacion dera Generalitat de Catalonha.