• Aguesti talhèrs, desvolopadi a trauès deth departament de Cultura e Lengua deth Conselh Generau d’Aran, an de servir entà fomentar era creativitat literària der alumnat, en tot promocionar tanben er emplec dera nòsta lengua pròpria

Eth Conselh Generau d’Aran, a trauès deth sòn departament de Cultura e Lengua, a iniciat es prumèri talhèrs d’escritura creativa adreçadi ar alumnat des centres educatius deth nòste territòri.

Es passades setmanes, es alumnes de cicle superior dera Escòla Sant Ròc de Bossòst participèren en talhèr de narracion de sciéncia ficcion e er alumnat de cicle miei en un menú poetic variat e de bon païr, impartidi peth tecnic de Lengua deth Conselh Generau d’Aran e escrivan, Xavi Gutiérrez. Pendent aguest mes s’amiaràn a tèrme tanben aguesti talhèrs en diuèrsi centres educatius dera Val d’Aran.

“Deth govèrn d’Aran ençà pensam qu’aguesti talhèrs serviràn entà fomentar era creativitat litèraria des escolans ath madeish temps que normalizam e promocionam er emplec dera nòsta lengua pròpria entre es mès petits” afirmaue era sindica d’Aran, Maria Vergés.