• Deuant es mesures de contencion deth COVID-19 que s’an auut d’aplicar enguan e qu’an afectat de manèra dirècta ath sector toristic, eth Conselh Generau d’Aran a aprovat redusir en un 50% eth còst dera quòta des sòcis de Foment Torisme Val d’Aran, en tot balhar supòrt ad aguest sector economic tant afectat pera pandèmia

Eth Conselh Generau d’Aran, pendent era amassada deth conselh rector de Foment Torisme Val d’Aran (FTVA) celebrada aguest maitin, a aprovat ua bonificacion deth 50% des quòtes des sòcis de FTVA corresponentes ar exercici de 2021, pr’amor des efèctes dera COVID-19 en sector toristic e comerciau dera Val d’Aran.

“Deth govèrn deth Conselh Generau d’Aran ençà èm fòrça conscients dera complèxa e dificil situacion qu’a auut de trauessar bona part deth nòste sector empresariau enguan, sustot eth relacionat damb era ostalaria e comèrç”, manifestaue era sindica d’Aran, Maria Vergés, en tot híger que “ei pr’amor d’açò que, laguens des nòstes possibilitats e competéncies, presentam aguesta bonificacion entà contribuïr ath supòrt deth sector economic aranés”.

Pera sua part, eth conselhèr d’Economia, Torisme e Promocion Economica, Juan Antonio Serrano, explicaue que “a despièch des bones donades toristiques obtengudes pendent aguest ostiu, que presentèrem era passada setmana,  èm conscients dera situacion generada pera evolucion deth COVID-19 eth darrèr an e miei, qu’a supausat era adopcion de mesures qu’an afectat especiaument ath sector toristic e, per aguest motiu, pensan qu’ère indispensable redusir aguesta quòta as associats e associades de FTVA”.

Eth govèrn deth Conselh Generau d’Aran tanben creèc aguesta primauera ua  linha d’ajuts, dotada d’un pressupòst de 210.000 euròs, damb era finalitat de tractar de palliar, en marc des sues competéncies, era afectacion ena activitat empresariau dera Val d’Aran, e que se concretèc en ajudes destinades a subvencionar  eth 50% deth rebut de lordères der an 2020.