• Eth govèrn d’Aran, coma administracion competenta en matèria de lengua, celebrarà aguest diuendres er acte de constitucion d’aguest òrgan d’assessoracion e consulta en matèria de politica e planificacion lingüistiques, qu’a coma principau objectiu trabalhar entara vitalitat sociau der aranés e balhar es criteris tecnics e lingüistics de besonh entà qu’es accions de promocion, normalizacion e difusion dera lengua agen un impacte positiu e dirècte ena perviuença der aranés

Aguest diuendres, 17 de seteme, aurà lòc er acte de constitucion deth Conselh Consultatiu der Aranés, er òrgan dera lengua pròpria d’Aran creat peth govèrn deth Conselh Generau d’Aran entà complir damb es foncions d’assessoracion e consulta en matèria de politica e planificacion lingüistiques.

“Er objectiu d’aguest òrgan ei trabalhar entara vitalitat sociau der aranés e balhar es criteris tecnics e lingüistics de besonh entà qu’es accions e politiques de promocion, normalizacion e difusion dera lengua agen un impacte positiu e dirècte ena perviuença der aranés”, afirme era sindica d’Aran, Maria Vergés, en tot híger que: “pendent er acte de constitucion deth Conselh Consultatiu se presentarà as sòns membres, professionaus de reconeishut prestigi e trajectòria, autors de nombroses publicacions e coneishedors dera nòsta lengua e der encastre occitan, membres de diuèrses universitats e organismes, coma era Universitat de Sorbonne o era Universitat de Lleida”.

Eth Conselh Consultatiu der Aranés analisarà es factors que tanhen ara vitalitat sociau dera lengua, prepausarà trabalhs de recèrca e repòrts, analisarà tanben es accions de política lingüistica qu’agen incidéncia en Aran, cossent damb er objectiu de promòir er emplec e coneishement der aranés, e dessenharà accions e politiques entà promòir er emplec dera lengua en toti es encastres dera societat aranesa, e entara disponibilitat de productes e servicis en aranés.