• Per miei des plataformes de Facebook, Instagram e Twitter, “En aranés” aufrirà fragments literaris, arrepervèris, dites e endonvietes damb er objectiu de normalizar e potenciar era lengua pròpria d’Aran

• Era creacion d’aguest compde preten tanben apropar er aranés ara ciutadania en tot difóner es critèris ortografics e gramatics e ajudar a conéisher es formes corrèctes dera lengua
  

Es hilats sociaus son, cada còp mès, ua part fonamentau dera nòsta societat e pr’amor d’açò eth govèrn deth Conselh Generau d’Aran a decidit crear “En aranés”, un compde oficiau enes hilats sociaus entara nòsta lengua.

A trauès der airau de politica linguistica deth Conselh, se crearàn periodicament contenguts de qualitat. S’i poderan trobar fragments literaris, arrepervèris, dites e endonvietes. E ath madeish temps es critèris ortografics e gramatics entà apréner a escríuer e a parlar era nòsta lengua. Atau madeish, tanben se presentaran es errors mès comuns que se hèn a nivèu orau. Tot de manèra atractiva, bric engüegiua.

Aguest nau compde ei present enes plataformes Facebook, Instagram e Twitter e aufrirà materiau multimèdia centrat en aprenentatge der aranés d’ua forma accessible tà toti es sòns seguidors e seguidores.

“Damb aguesta iniciativa, des deth govèrn deth Conselh pretenem dar un pas en impuls der aranés que malerosament passe per moments fòrça delicadi”, manifèste eth sindic d’Aran. E hig que “era nòsta lengua pròpria ei eth màger signe d’identitat que possedim e ei eth nòste déuer hèr tot aquerò que sigue enes nòstes mans entà preservar-la e potenciar-la”.