• Eth Plen deth Conselh Generau d’Aran a aprovat aguest maitin era declaracion institucionau impulsada peth govèrn d’Aran entà manifestar eth supòrt dera maxima institucion aranesa ara candidatura des Jòcs Olimpics d’Iuèrn Pirenèus-Barcelona 2030 e era volentat deth Conselh d’èster ua institucion activa entà arténher aguest succès

Eth Plen deth Conselh Generau d’Aran a aprovat per unanimitat, ena session ordinària d’aguest maitin, era declaracion institucionau presentada peth govèrn d’Aran entà manifestar eth sòn supòrt ara candidatura entàs Jòcs Olimpics d’Iuèrn Pirenèus-Barcelona 2030 e era sua volentat d’èster ua institucion activa entà arténher aguest succès.

Eth passat mes de junhsèga, eth president deth Comitat Olimpic Espanhòu envièc ua carta ath president deth Comitat Olimpic Internacionau en tot expressar er interès en organizar en 2030 es Jòcs Olimpics d’Iuèrn Pirenèus-Barcelona. En aguesta missiva s’i higien tanben es corresponentes cartes de supòrt deth president der Estat, Pedro Sánchez, eth president dera Generalitat de Catalunya, Pere Aragonès e eth president deth Gobierno de Aragón, Javier Lambán.

“Deth govèrn deth Conselh Generau d’Aran ençà èm convençudi qu’era celebracion d’aguesti Jòcs Olimpics en Pirenèu ei ua grana oportunitat entàs territòris involucradi en generau e entara Val d’Aran en particular, sustot pr’amor que se plantegen damb uns critèris de sostenibilitat que pensam que son de besonh” manifestaue era sindica d’Aran, Maria Vergés, en tot híger que: “ua oportunitat d’aguestes dimensions generarie un impuls enes nòstes infraestructures, ena nòsta projeccion internacionau, atau coma ena actualizacion des installacions esportives dera Val d’Aran, per aguest motiu eth Conselh Generau vò èster ua institucion activa entà arténher eth succès d’aguesta candidatura, conscients der impacte positiu que poirie auer entath futur deth nòste territòri”.

Era declaracion institucionau aprovada aué manifèste qu’es JJOO son ua oportunitat entà méter en foncionament un projècte esportiu damb er objectiu de prebotjar era practica des espòrts d’iuèrn e, ath madeish temps, plaçar Aran coma territòri de referéncia en aguest airau, e senhale tanben qu’aguesta candidatura a d’esdevier eth motor entara consolidacion d’un modèl de desvolopament sostenible e respectuós damb eth territòri, deuant des rèptes de futur que se presenten, coma eth cambi climatic, era diversificacion economica o era fixacion de poblacion e de servicis publics de qualitat.

En aguest sens, era sindica d’Aran afirmaue que: “eth projècte dera candidatura Pirenèus-Barcelona 2030 ei basat en critèris de sostenibilitat ambientau, equilibri, coesion territoriau e profitament des infraestructures, pr’amor que s’adaptarà as dejà existentes e ajudarà a melhorar-ne fòrça d’eres, e non i a prevision de bastiment de naues zònes urbanistiques ne d’estacions d’esquí” e, en aguest sens, higie: “ei important destacar eth besonh qu’es govèrns acòrden naues inversions coma pòden èster era melhora des accèssi e des comunicacions en territòris a on ei fòrça de besonh, coma ei eth cas dera Val d’Aran”.

Per miei d’aguesta declaracion institucionau, que se harà arribar ath departament dera Presidéncia dera Generalitat, ath Comitat Olimpic Espanhòu, era Reau Federacion Espanhòla d’Espòrts d’Iuèrn (RFEDI), era Federacion Catalana d’Espòrts d’Iuèrn (FCEH), ath Conselh Superior d’Espòrts, ath Conselh Catalan der espòrt e ar Ajuntament de Barcelona, eth plen deth Conselh Generau inste ara Generalitat a que, en marc dera sua singularitat, era maxima institucion aranesa forme part der òrgan interdepartamentau adscrit ath departament de Presidéncia dera Generalitat que mercarà es mecanismes de participacion ciutadana, cercarà era coeréncia damb era estrategia deth govèrn en Pirenèu tàs pròplèu ans e harà un seguiment deth projècte.

Pendent aguest plen ordinari celebrat aué, s’a metut en coneishement era renóncia deth conselhèr generau d’Aran peth terçon de Quate Lòcs, presentada per Francés Boya, e s’a aprovat era cession en comodat deth hons patrimoniau de Casa Matèria – Çò de Mari de Turrull de Vielha e de Çò de Monge d’Arró, en Archiu Generau d’Aran.