• Eth sindic d’Aran dauric eth talhèr de de Profitament des recorsi naturaus e culturaus entath desvolopament integral des territòris de montanha, en tot afirmar que “non i aurà ciutats sostenibles se non i a un mon rurau viu”

Era Val d’Aran acuelhec ager, 13 de gèr, eth talhèr de Profitament des recorsi naturaus e culturaus entath desvolopament integral des territòris de montanha, en quau participèren es alumnes deth màster universitari de Gestion d’Airaus de Montanha dera Universitat de Lleida (UdL), damb era collaboracion dera Universitat Autònoma de Barcelona (UAB) e era Universitat de Barcelona (UB).

Eth sindic d’Aran, Francés Boya, dauric aguesta jornada formatiua en tot parlar sus es especificitats dera Val d’Aran, es rèptes e oportunitats qu’implique víuer en un territòri de montanha, era importància qu’a d’auer eth mon rurau e sus eth cambi climatic, pr’amor que, atau coma afirmèc, “non i aurà ciutats sostenibles se non i a un mon rurau viu”.

Aguest talhèr compdèc damb es intervencions dera responsable de Foment Torisme Val d’Aran, Marisol Ariño, eth geoleg Jordi Gavaldà, e era directora de Musèus Val d’Aran, Carla del Valle, que compartiren es sues experiéncies e punts d’enguarda sus es sòns airaus damb es presents.

Sigueren presents en aguesta jornada tanben es professors impulsors deth projècte: Joan Ganau (UdL), Montserrat Salvà-Catarineu (UB) e Albert Pèlachs (UAB).

En màster de Gestion d’Airaus de Montanha s’impartís un talhèr practic on es alumnes an d’estudiar es oportunitats e rèptes qu’aufrissen eth patrimòni naturau e culturau de diuèrsi territòris deth Pirenèu, damb er objectiu de hèr prepauses realistes entà hèr compatibles aguesti airaus.