Vielha, 3 de mai de 2019.- Eth Govèrn d’Aran a tornat a adjudicar es òbres de melhora des accèssi ara Ribèra de Valarties ara enterpresa Cervós SA, dempús qu’era prumèra enterpresa adjudicatària, Otxandiano Empresariau SAU, non age pogut complir damb eth contracte assignat.
Es òbres son includides laguens eth projècte de conservacion des accèssi ar auviatge naturau e culturau dera Val d’Aran que desvolòpe eth Conselh Generau d’Aran damb hons provenenti des projèctes FEDER 2014-2020 d’accions destinades ara conservacion d’accèssi ar auviatge naturau e culturau de gran valor païsatgistic, patrimoniau e istoric dera Val d’Aran e finançament dera Deputacion de Lhèida.
Eth pressupòst totau destinat entad aguesti trabalhs ei de 361.790 €.
Damb era realizacion d’aguesti trabalhs, amassa damb es accions qu’est an passat amièc a tèrme er Ajuntament de Naut Aran ena madeisha ribèra entà apariar es desperfectes causadi pes aiguats, eth Conselh Generau d’Aran deisharà totauments apraiadi es accèssi ara ribèra de Valarties.
Eth projècte deth Conselh Generau d’Aran, englobe toti es municipis dera Val d’Aran e presente un conjunt d’intervencions e òbres importantes entà apariar e recuperar tot un conjunt de vies d’accès ath miei naturau dera Val d’Aran, mejançant diuèrses accions de melhores e òbres d’accèssi enes airaus naturaus destacables d’Aran, entà hèr-les visitables e accessibles toristicament, en tot prestar especiau atencion tanben as besonhs des persones damb mobilitat redusida.
Eth sindic d’Aran, Carlos Barrera, a manifestat que “eth miei naturau, ei un recors toristic de prumèr orde entara Val d’Aran pendent fòrça mesi der an, e aguest projècte s’enquadre ena linha de trabalh deth Conselh Generau d’Aran, quina des dera sua restitucion en 1990, e es posteriors traspassi de competéncies en torisme e miei naturau dera Generalitat de Catalonha, a amiat a tèrme entà hèr visitables aguesti espacis e protegir-les”.
Er apàrii des pistes forestaus tanben facilitarà er accès as refugis de nauta montanha coma eth de Restanca, Colomers, Saboredo, o es dera Artiga de Lin e Aneto pera ribèra dera Artiga e er itinerari d’accès ath Montlude.
