• Era sindica d’Aran e er alcalde de Vilamòs an visitat aué era glèisa de Santa Maria, un còp finalizada era actuacion qu’era maxima institucion aranesa a hèt entà melhorar eth drenatge deth mur perimetrau dera glèisa, fòrça afectat pera umiditat. Tanben s’a sanejat e restaurat era façada meridionau, a on a apareishut un element esculpit que demoraue amagat darrèr deth ciment

Aguest maitin, era sindica d’Aran, Maria Vergés, acompanhada der alcalde de Vilamòs, Oriol Sala, e era tecnica der Airau d’auviatge culturau deth Conselh Generau d’Aran, Elisa Ros, an visitat era glèisa romanica de Santa Maria de Vilamòs dempús dera actuacion qu’era maxima institucion aranesa a amiat a tèrme entara sua preservacion e melhora.

Era òbra, qu’a auut un còst de lèu 40.000 € e a estat finançada peth Conselh Generau d’Aran damb eth supòrt economic dera Deputacion de Lhèida e eth departament de Cultura dera Generalitat de Catalunya, a consistit en drenatge e sanejament deth mur perimetrau nòrd e èst dera glèisa, un mur qu’ère fòrça afectat pera umiditat. Tanben s’a sanejat e restaurat era sua façada meridionau, a on i é er antic portau d’accès, cegat en sègle XIX, quan se dauric era naua e actuau pòrta, d’estil neoclassic.

A cada costat d’aguesta pòrta cegada, reconvertida en hièstra, se tròben encastrades en mur tres pèces d’epòca romana. Enes extrems, dus monuments funeraris (plaques d’urna cinerària) en cadun des quaus se i representen tres personatges. Entre aguestes i a un tresau element roman, possiblament un autar votiu damb era representacion d’un personatge masculin despolhat e de pè.

Ath long dera execucion dera òbra, dempús de trèir un emplastre de ciment, a apareishut un quatau element esculpit: se tracte d’un petit blòc de marme rectangular, enquadrat per un bordon que represente ua bèstia damb còrnes, possiblament ua vaca o un taure. Encara que calerà qu’es especialistes estúdien aguesta naua pèça arqueologica, en principi, semble tractar-se d’un monument tardoroman que, coma toti es auti, siguec reutilizat en moment deth bastiment dera glèisa.

“Aguesta intervencion, qu’ère fòrça de besonh entà reparar es maus ocasionadi pera umiditat, contribuís ara conservacion, dignificacion e valorizacion des valors qu’a era glèisa de Santa Maria de Vilamòs”, asseguraue era sindica d’Aran, Maria Vergés, e higie que “entath govèrn deth Conselh Generau d’Aran eth mantenement e promocion deth nòste auviatge culturau e istoric ei clau; per aguest motiu, èm plan satisfèts d’auer podut amiar a tèrme aguesta actuacion”.