• Aguest exemplar siguec avistat era passada setmana e presentaue ua clara dificultat locomotritz ena pauta posterior esquèrra, eth Grop de Trabalh der os en Pirenèu s’amassèc entà valorar es possibles causes d’aguesta afeccion, que se considère probable que sigue deguda ara auançada edat der os Nere, totun s’amiarà a tèrme un seguiment entà comprovar se i a bèra evolucion en sòn estat de salut

Era tarde deth passat dijaus, 21 d’abriu, s’observèc ar os Nere ena zòna deth Baish Aran. Era observacion metec en alèrta as tecnics que realizauen eth seguiment, pr’amor qu’er os presentaue ua clara dificultat locomotritz ena pauta posterior esquèrra. Per aguest motiu se convoquèc eth Grop de Trabalh der os en Pirenèu, damb tecnics de diuèrses administracions d’Espanha e França, e s’avalorèc es possibles causes dera afeccion que presente er os Nere.

Pendent era amassada, se valorèren es diuèrses causes e formes de procedir, en tot considerar que çò de mès probable ei bèth tipe d’afeccion relacionada damb era avançada edat der exemplar. De hèt, se dispause de gravacions realizades en ostiu de 2020 a on er os dejà mostraue ua clara dificultat motora enes pautes posteriores, que dan fòrça ara ipotèsi d’ua degradacion progressiua dera salut der animau, maugrat que non se pòden descartar d’autes causes.

Totun, tanben existissen videos de camères de fotoparament de 2021 a on er os semble comportar-se damb normalitat. De moment, s’a optat per sajar d’efectuar un seguiment dera zòna a on s’observèc, entà veir se pòt tornar-se a observar a Nere e comprovar se i a bèra evolucion en sòn estat de salut.

Nere neishec en Pirenèu en iuèrn de 1997 e ei hilh de Ziva, era ossa capturada prenhada en Eslovènia e metuda en libertat enes Pirenèus en 1996. Per tant, a 25 ans d’edat e ei considerat er exemplar d’os mès vielh deth Pirenèu.