Vielha, 14 de junh de 2019.- Eth Conselh Generau d’Aran a acordat er aquesiment de dues finques que permeteràn er ampliament deth Parc de Visualizacion de Fauna dera Val d’Aran-Aran Park plaçat en Bossòst.
Eth Conselh Generau d’Aran aquerirà es finques de 26.981 m² qu’includissen ua edificación bastida de 230 m².
Damb era crompa d’aguestes finques avalorades en 252.000 € eth Conselh Generau d’Aran amiarà a tèrme un important ampliament deth Parc de Visualizacion de Fauna dera Val d’Aran que permeterà er entratge de naues espècies e naui lòcs d’observacion des animaus d’Aran Park. D’ací qu’eth Conselh Generau a sollicitat er ampliament deth Plan Generau Urbanistic dera Val d’Aran qu’a de perméter er ampliament deth parc.
D’auta part, eth Conselh Generau d’Aran invertirà 74.831 € entath bastiment d’un espaci barrat especiau entà ossi ath costat d’Aran Park que s’amiarà a tèrme damb ua subvencion de 45.000 € provenentes deth Projècte PirosLIFE includit en programa Life-Natura, damb er objectiu de contribuïr ara aplicacion dera directiva comunitària relativa ara conservacion dera natura entà mantier e melhorar es abitats naturaus e es espècies animaus e/o vegetaus d’interès comunitari des espacis designadi laguens eth Hilat Natura 2000.
Eth parc de Visualizacion de Fauna dera Val d’Aran-Aran Park aufrís era possibilitat de descorbir era fauna sauvatja des montanhes deth Pirenèu, en un recorregut d’ues 2 ores apuprètz de durada, que permet observar animaus en semillibertat coma ossi, gatilops, nutries, lops, marmotes, caparròis, grani cèrvis, crabes sauvatges, isards e cabiròus, daines, paums e d’auti unguladi de montanha en sòn entorn naturau.
Eth Parc de Visualizacion de Fauna Aran Park, aucupe actuauments ua superfícia de vint ectares en Bossòst, en ua des vessants deth Pòrt deth Portilhon entre era Val d’Aran e Bagnères de Luchon, a on se pòden observar es diferentes espècies d’animaus damb un totau de mès d’un centenat d’exemplars.
Aran Park, qu’er an passat arrecebec 42.000 visitants ei daurit toti es dies des deth passat 6 d’abriu enquiath 3 de noveme.
Fotos: Aran Park