• Enquiara, aguesta app facilitaue era remassada pòrta a pòrta dera fraccion deth carton entre es establiments comerciaus deth territòri, mès ara tanben permeterà notificar era preséncia de voluminosi enes pobles petits dera Val d’Aran entà hèr-ne un seguiment e retirar-les tant lèu coma sigue possible

• Cau rebrembar qu’es voluminosi an d’èster depositadi enes depòsits de dèishes dera Val d’Aran, e qu’eth sòn abandonament enes ièrles non sonque ei incivic, senon qu’ei tanben sancionable

Pendent eth Conselh de Bailes celebrat aué, deth departament de Residus deth Conselh Generau d’Aran ençà, s’a presentat as alcaldes/esses e presidents/es des EMDs deth territòri era naua foncion dera app ‘Jo Recicli’.

“Entà mantier netes es ièrles des pòbles mès petits dera Val d’Aran e, ath madeish temps, facilitar eth trabalh deth personau que se n’encuede dera retirada des residus, era app ‘Jo Recicli’ permeterà as alcaldes e alcaldesses notificar era preséncia de voluminosi entà poder hèr un seguiment e retirar-les tant lèu coma sigue posible”, explicaue eth conselhèr de Territòri, Paisatge e Gestion Ambientau, Oriol Sala, en tot híger que: “ei de besonh rebrembar qu’es voluminosi an d’èster depositadi enes depòsits de dèishes dera Val d’Aran, e qu’eth sòn abandonament enes ièrles non sonque ei incivic, senon qu’ei tanben sancionable”.

Enquiara, era app auie coma principau objectiu facilitar era remassada pòrta a pòrta dera fraccion deth carton entre es establiments comerciaus deth territòri. Per miei d’aguesta aplicacion, desvolopada pera empresa aranesa Maladeta Studio, es comèrci dera Val d’Aran registradi pòden generar ua alarma, laguens der orari establit, entà qu’eth servici de remassada de lordères s’empòrte aguesta fraccion.