• Aguesta tecnologia permeterie hèr front a un des principaus punts febles deth territòri, qu’ei era manca de cobertura mobil, entà poder implementar, de forma transversau en toti es sectors economics, es procèssi de digitalizacion de besonh entà esdevier ua destinacion intelligenta e generar un marc d’oportunitats a nivèu tecnologic

Eth Conselh Generau d’Aran inície un projècte d’innovacion qu’a coma principau objectiu crear ua infraestructura d’antenes entà desplegar un hilat de cobertura LORA qu’ajude ara Val d’Aran a auançar entà esdevier ua destinacion intelligenta e hèr eth nòste territòri mès competitiu a nivèu digitau, en tot generar un marc d’oportunitats a nivèu tecnologic.

“Eth govèrn deth Conselh Generau d’Aran vò amiar a tèrme un procés de digitalizacion e innovacion en tot apostar per aplicar er Internet des Causes en diuèrsi sectors dera Val d’Aran, totun, coma territòri rurau e de montanha auem de hèr front a fòrça rèptes entà convertir-mos en ua destinacion intelligenta ena qu’eth procés de digitalizacion sigue transversau en toti es sectors economics deth territòri”, afirmaue era sindica d’Aran, Maria Vergés, en tot híger que: “un des nòsti principaus punts febles ei era insufisent cobertura mobil damb era que compdam entà amiar a tèrme es procèssi de connexion e digitalizacion de besonh”.

Ei per aguest motiu qu’eth govèrn deth Conselh Generau aquesirà quauques antenes de cobertura LORA, un tipe de cobertura ràdio (800 MHz) que s’artenh a partir deth plaçament estrategic d’antenes de baish còst e que permet connectar de forma simpla e eficient sensors repartidi per tot eth territòri sense eth besonh de compdar damb cobertura mobil. Aguesti sensors pòden èster consultadi a trauès de quinsevolh tipe de dispositiu (mobil, tablet o ordenador), en tot recéber informacion de çò que passe en un punt remot o connectant procèssi sense eth besonh de cobertura.

“Aguesta tecnologia mos pòt èster util entà diuèrses foncions coma eth contròl d’accèssi as ribères e d’auti punts de naut interès toristic, era monitorizacion dera ramaderia entath contròl deth bestiar e era prevencion d’atacs d’os, eth seguiment e monitorizacion de risqui naturaus coma lauegi, inondacions, incendis o estacions meteorologiques o ena proteccion civiu, en tot crear punts de cobertura de secors o sensors de seguiment de persones en punts sense cobertura mobil, per exemple”, explicaue era sindica.

Cau rebrembar qu’aguesta tecnologia dejà se comencèc a aplicar aguest ostiu en ua pròva pilòt entara monitorizacion dera ramaderia extensiva deth territòri mejançant colièrs de geolocalizacion e estat deth bestiar, e tanben entath contròl de risqui naturaus. Eth pròplèu pas que prevé eth Conselh Generau d’Aran ei començar a aplicar aguesta cobertura entara digitalizacion deth contròl d’accèssi ar entorn naturau.