• Eth Govèrn aranés includís 22.000€ entàs ajudes as esportistes estudiants dera Val d’Aran entar an 2015.

Eth Plen deth Conselh Generau d’Aran aprovèc per 7 vòts a favor de CDA e era abstencion d’UA-PSC e deth PRAG es pressupòsti entar an 2015 que ascendissen a 27 milions d’euròs e qu’includissen ua naua rota toristica, era ampliacion deth refugi dera Artiga de Lin e era melhora der airau quirurgic der Espitau Val d’Aran. En pressupòst s’includís ua partida de 22.000€ entàs ajudes as esportistes estudiants dera Val d’Aran.

En paraules deth vicesindic d’Aran e conselhèr d’Espòrts, Luís Carlos Medina “er objècte d’aguestes bases ei regular era concession d’ajudes e subvencions economiques qu’autrege eth Conselh Generau d’Aran as joeni esportistes d’Aran qu’agen projeccion cap ath naut nivèu esportiu, e a coma objectiu motivar era contunhitat dera sua carrèra esportiua ath temps qu’estudien ara fin d’arténher en un futur era categoria d’esportistes de naut nivèu”.

En son beneficiaris es joeni aranesi qu’estudien ensenhaments obligatòris (ESO) o post obligatòris (Cicles Formatius o Estudis Universitaris), entre es 14 e 22 anys, e siguen esportistes en actiu.

Er impòrt dera ajuda individuau depenerà deth tipe de beca artenhuda segontes es punts des taules de barem expausades enes bases que publicarà eth Conselh Generau d’Aran pendent eth mes de mai/junh.

– Beca A   1.500,00 euros
– Beca B       750,00 euros

I aurà ua Comission Tecnica d’Avaloracion qu’aurà coma objectiu avalorar totes es peticions e harà era prepausa d’autrejament des ajudes. Atau madeish, serà er encarregat de hèr eth seguiment des ajudes autrejades.

Medina a hijut “eth Conselh Generau d’Aran, un viatge se publiquen es bases en mes de mai/junh, darà informacion, facilitarà es bases e es formularis dera presenta convocatòria a quinsevolha persona que sigue interessada ena ajuda”.