• Eth libre blanc des refugis d’Aran, que nèish dempús de fòrça temps de trabalh e coordinacion ena Comission de Refugis entre eth Conselh Generau e es representants d’aguest sector en nòste territòri, servirà coma guida de bones practiques en ahèrs de planificacion, melhores e manteniment.

Eth Plen deth Conselh Generau d’Aran a aprovat aué, pendent era celebracion dera darrèra session ordinària dera legislatura, eth libre blanc des refugis dera Val d’Aran.

Aguest projècte nèish dempús d’ans de trebalh ena Comission de Refugis dera Val d’Aran, entre representants deth sector e eth Conselh Generau d’Aran. Servirà coma guida de bones practiques e sustot de planificacion, melhores e manteniment que cau hèr enes refugis gestionadi peth Conselh Generau d’Aran damb era implicacion plan importanta des guardes. Eth libre blanc des refugis d’Aran serà ua huelha de rota entà establir es prioritats des refugis dera Val d’Aran.

Pendent aguest Plen, tanben s’an aprovat es modificacions entara regulacion d’accès ath Miei Naturau pendent era sason d’ostiu, coma se ven hènt pendent es darrèri ans, tà evitar es massificacions enes montanhes d’Aran. Enguan s’a alongat eth periòde der 1 de junh enquiath 15 de seteme (pendent es prumèri quinze dies, aguesta regulacion s’amiarà a tèrme sense personau enes barrères) entà facilitar qu’eth servici de taxi pogue èster actiu en dates senhalades quan non i a tanta afloéncia.

S’a procedit tanben ara aprobacion iniciau dera declaracion e catalogacion dera Capèla dera Mair de Diu dera Pietat o dera Lana de Les coma Ben Culturau d’Interès Locau (BCIL) entara sua proteccion.

Vielha, 5 de mai de 2023