• Eth Plen deth Conselh Generau d’Aran a aprovat provisionaument aguest maitin, damb es vòts a favor d’UA e era abtencion de CA, eth pressupòst dera maxima institucion aranesa tà 2023, qu’ascendís a lèu 42.000.000 €, eth mès naut dera istòria deth govèrn d’Aran. Totun, aguest pressupòst demore condicionat pera aprovacion des pressupòsti dera Generalitat de Catalunya

• Era diferéncia de lèu 4 milions d’euròs entre eth pressupòst d’enguan e eth previst entà 2023, anarie destinada ara inversion en airaus basics entath desvolopament sociau e economic dera Val d’Aran, especiaument centrat ena atencion as persones, tostemp qu’era Generalitat amie entà deuant es sòns pressupòsti

Eth Plen deth Conselh Generau d’Aran a aprovat provisionaument aué, damb es vòts a favor der equip de govèrn d’UA e era abstencion de CA, eth pressupòst dera maxima institucion aranesa tà 2023, de lèu 42.000.000 €.

“Aguest pressupòst, que se prevè eth mès naut dera istòria deth Conselh Generau d’Aran, demore condicionat pera aprovacion des pressupòsti dera Generalitat de Catalunya” afirmaue era sindica d’Aran, Maria Vergés, en tot híger que: “era diferéncia de lèu casi 4 milions d’euròs que i a entre eth pressupòst d’enguan e eth 2023 anarà destinada a inversion en airaus basics entath desvolopament sociau e economic dera Val d’Aran e especiaument centrat ena atencion as persones”.

Çò que destaque mès d’aguest pressupòst ei era apòsta pera atencion as persones damb er aument des partides en atencion sociau e sanitat, era apòsta pera innovacion e era transicion energetica atau coma questions relacionades damb eth manteniment e melhora der auviatge e er impuls e promocion der aranés.

Era sindica d’Aran dejà a instat per carta ath president dera Generalitat, Pere Aragonès, a aprovar es pressupòsti de 2023 pr’amor que, deuant d’ua possible prorròga “mos traparíem deuant dera incertesa de tornar a patir un incompliment der acòrd de finançament entre eth Conselh Generau e era Generalitat,  que mos plaçarie en ua situacion fòrça delicada, nauaments, entà poder afrontar era gestion des nòstes competéncies, quauquarren qu’a un impacte dirècte ena qualitat de vida dera ciutadania e en desvolopament territoriau d’Aran”.

En aguest sens, cau rebrembar qu’eth govèrn d’Aran a reclamat en diuèrses ocasions era melhora urgenta deth finançament en matèria de lengua e cultura. Atau madeish, eth Consleh Generau d’Aran trabalhe tanben entà arténher eth traspàs definitiu en atencion sociau e era melhora des traspassi en matèria d’abitatge.