Eth Conselh Generau d’Aran apròve eth pressupòst tà 2020

deseme 20, 2019 Govèrn, Promocion economica

  • Eth pressupòst iniciau aprovat a ua clara vocacion sociau e ua part fòrça important des partides son destinades ad aguest encastre

Eth Plen deth Conselh Generau d’Aran a aprovat iniciaument aué, en session extraordinària, eth pressupòst generau entar an 2020, damb es vòts a favor deth govèrn e es vòts en contra deth grop de Convergéncia Democratica Aranesa (CdA).

Eth pressupòst entar an 2020 ei de 30.157.816 euròs, impòrt que creish respècte ath der an anterior (29.349.297 euròs). Ei un pressupòst de contencion a on disminuís era partida destinada as cargues elèctes e a on era aportacion mès importanta son es mès de 21.120.000 euròs que provien dera Generalitat de Catalunya.

Eth sindic d’Aran, Francés Boya, a lamentat eth vòt en contra dera oposicion: “ei insòlit que se vòte en contra d’un pressupòst iniciau; quan Unitat d’Aran (UA) ère ena oposicion tostemp auiem optat pera abstencion entà facilitar era gestion pressupòstaria”. Atau madeish, Boya a qualificat de “pèsim” er argument esgrimit pera oposicion entà justificar aguest vòt en còntra e a defenut que “tota era documentacion pertinenta ei a disposicion de toti es conselhèrs e conselhères ena secretaria deth Conselh Generau d’Aran”.

Eth pressupòst iniciau aprovat a ua clara vocacion sociau e ua part fòrça important (12.542.000 euròs) se destinen ar encastre dera sanitat, n’aguest pressupòst ei contemplat un increment de mès de 360.000 euròs respècte ath der an anterior enes partides entara contractacion de nau personau medic, partides que provien dera implementacion des acòrds der ICS e dera implementacion deth plan estrategic.

Tanben se destinaràn 500.000 euròs ar airau de torisme entara promocion toristica e d’iniciatives esportiues vinculades a proves coma era Val d’Aran by UTMB, e s’invertiràn 370.000 euròs en transpòrt de viatgers.

Entre d’autes partides, trapam ua inversion de lèu 490.000 euròs entath mantenement de camins, pistes forestaus e refugis e ua auta de 155.000 destinada as bibliotèques publiques.

Era inversion se place ath torn des 644.000 euròs, e i destaque especiaument eth projècte ciclable TransGarona, en quau s’invertiràn 202.000 euròs.

Comments are closed.