• Eth Plen deth Conselh Generau d’Aran a aprovat iniciaument aué, damb es vòts a favor d’UA e era abstencion de CA, eth pressupòst dera maxima institucion aranesa, qu’enguan ei de 46.166.577,61 €.

• Aguest pressupòst ei fòrtament condicionat pera manca de pressupòsti ena Generalitat de Catalunya, çò que limite era disponibilitat de finançament deth Conselh Generau d’Aran tad aguest 2025.

Eth plen deth Conselh Generau d’Aran a aprovat iniciaument aué, damb es vòts a favor de Unitat (UA) e era abstencion de Convergéncia Aranesa (CA), eth pressupòst dera maxima institucion aranesa, qu’enguan artenh es 46.166.577,61 € sò que supause un increment de 2,2 milions d’èuros respècte 2024, que se destine en grana mesura ar airau sanitari e sociau.

Des deth Conselh Generau se vò asolidar damb aguesti pressupòsti actuacions importantes ath torn dera assisténcia sanitària en territòri  coma eth dera oncologia, e sustot era fixacion de professionaus sanitaris. N’aguest sens cau destacar qu’eth pressupòst der airau sanitari e sociau enes darrèri quate ans a passat des 15’1 milions d’euros e 2021 as 21’7 milions entà 2025, un increment que respon per un costat ar aument dera activitat en diuèrsi airaus coma er oncologic, e per aute as dificultats tara fixacion de professionaus.

Atau madeish, entad aguest 2025 es inversions previstes a destacar n’aguest airau, son era reforma der Espitau Val d’Aran, dera que dejà s’a adjudicat era redaccion deth projècte des fases 0 e 1, e eth renauïment dera sua codina, pressupostat en 515.000€.

En un aute orde de qüestions, per çò que hè as inversions en d’auti airaus, en destaquen partides entara reabilitacion dera Casa deth Senhor d’Arròs, damb 351.000€, 142.000€ tàs reformes de besonh en refugi de Restanca o 125.000€ entar assolidament des bòrdes der Ecomusèu de Joanchiquet.

En cultura e lengua se contemplen partides entà, entre d’autes accions, era creacion d’ua plataforma de formacion on line en aranés, tanben era produccion deth cançonèr tradicionau aranés en collaboracion damb es escòles araneses e era creacion d’un lòc web de recorsi pedagogics e publicacions diuèrses damb ua inversion de 200.000€.

Per çò que hè as airaus de ramaderia e miei ambient, se melhoren es convènis damb es associacions ramadères e se mantieràn es ajudes ath bestiar non retornat e bestiar despareishut atau coma ua partida entara adquisicion de naua maquinària en aucider dera Val d’Aran.

Destaquen tanben es inversions en matèria de torisme damb eth bastiment d’ua oficina de torisme en Salardú e era melhora dera caseta d’informacion en Arties, damb ua aportacion de 58.000€ ar Ajuntament de Naut Aran.

En airau d’Espòrts se mantieràn es convènis de collaboracion damb es entitats e associacions esportives araneses coma era UE Bossòst, era Escòla de Fotbòl, eth Conselh Esportiu, era AE Institut d’Aran e rèsta d’associacion esportives en airau d’ensenhament, Club Swim Team, Club Espòrts Gèu, Club Hockey Gèu e Escòla de Fotbòl Baish Aran entre d’auti, atau coma es partides as centres de formacion e tecnificacion. Atau madeish se mantien es bèques entà esportistes de naut rendiment damb 24.500€ e era aportacion ar Ajuntament de Vielha e Mijaran tath mantenement deth Palai de Gèu damb 120.000€.

En matèria d’emergéncies en destaquen es prepauses d’inversion per part de Pompièrs Emergéncies entar aqueriment pendent aguest 2025 de diuèrsi veicles entre es que ne destaquen ua autoescala autobomba pressupostada en 1’1 milions d’euros, ua autobomba forestau de 325.000€ e ua de pesada de 525.000€, atau coma materiau d’autoproteccion diuèrs. Atau madeish, destaquen en aguest airau era partida destinada entà qu’era Val d’Aran compde damb un elicoptèr de rescat dotada damb 450.000€

Tara sindica d’Aran, “aguest pressupòst ven fòrça condicionat pera manca de pressupòsti ena Generalitat, qu’a prorrogat per dusau an consecutiu es sòns compdes, totun, era volontat deth govèrn d’Aran ei era de consolidar es servicis publics en nòste territòri, tot e era dificultat entà desvolopar inversions”.

Vielha, 14 de març de 2025